Kuantos mezes pasaron desde ke eskrivi por la Primavera? Komo se fueron?…Estamos bivyendo la fin del enverano, el mez de Septembre, mesajero del Otonyo. En Mayo, mos espertimos una demanyana, kon un sielo klaro, un sol briyando. Un poko otro va ser la kontra. Madrugadas freskas, demanyanadas mas oskuras.. Alora, puedemos suetar la byenvenida al Otonyo.
Si keresh saver la verdad keridos amigos, deshad achetar, yo no puedo afilu konsever la idea ke esta sezon seya sinonimo de melankolia. Orozamente ke no es para todos. No kero egzajerar, de sorte ke me entravi de emplear el byervo ”tristeza.” Un poko de ayre, un sielo eskuro i de vezes en kuando luvyozo no deven trokar muestra umor. Prefero a la kontra, pensar ke la sivdad se arrebive. Konsertos, ekspozisyones, okazyones de ver los amigos esparzidos por aki por ayi en enverano, ets… Naturalmente, los konsertos “en plein air” no mankaron este anyo, igual ke los anyos pasados. Bueno…
Estambol se esta aparejendo a bivir el Otonyo i toda la prisa del empesijo de una sezon. Normalmente, la avyertura de las eskolas lo mas importante para munchas famiyas.. Esto se esta konstatando de munchas maneras. Antes de todo, el trafiko!…Ya empesimos a oyir de mas en mas, klaksones, sinyo de la despasensya de los konduktores. Los kaminos serrados, muchidumbre asperando en los terminus i tambyen, los otobuses kargados…Estas son las vizyones abitualas de muestra sivdad.
Poko a poko las vitrinas estan trokando de facha i de prodoktos. Estamos vyendo trokamiento en syertas vedruras (legumbres). Ma, no se puede dezir ke ay muncha diferensya. Invyerno estamos topando kaji, todos los legumbres de enverano, ke no syento el menester de enumerar!.. İ por primera vez, oganyo enverano entero vide espinaka freska en los marketes. Al pareser ke el solo trokamiento ke vamos a ver en las vitrinas, van a ser las vestimientas de sezon.
Otonyo, kon sus ayres i sus luvyas, las ojas amariyas o ruvyas, bolando sovre los trotuares, mesajeros infayivles de la sezon…I, las luvyas ke mos van apanyar en supeto (esto ya lo bivimos i en Agosto!). En vezes, el sol va topar un pasaje entre las nuves, i un poko timido, mos va amostrar su kara para alegrarmos!…Miles de pasharos migrantes, se estan aparejando a abandonar la sivdad. El ritmo de la natura esta lavorando sin marearse, sin falta, komo una makina byen montada, una komputadera byen programada.
Portanto, Septembre no es la fin del enverano. En el Sud de muestro pais se esta dayinda bivyendo el enverano, yeno, yeno. Es una grande oportunidad de vakansas para los ke no izyeron dayinda. Siguro si no tyenen algun impedimyento de lavoro urjente o eskolas… Si no me yerro, es una sezon konsiderada komo muerta del punto de vista turismo, i ansi, se puede azer vakansas mas ekonomikas i mas kalmas.
Otonyo kon los mezes de Elul i tambien el mez de Tishri, tyenen otras ermozuras, otras partikolaridades para mozotros, Djudios. El mez de “Elul” es dicho ser mez de “Oportunidad”. Los diyas entre 1 “Elul” -10 “Tishri” fueron syempre konsiderados komo una peryoda espesyal, de egzamen de konsiensa, de arrepentimiento i de perdonansa. El diya de 10 Tishri “Yom Kipur” es diya de grande “Pardon”.
Tishri, es el mez de las fyestas tambien, de selebrasyones alegres komo “Simhat Tora”. Es el empesijo de una mueva anyada. En metyendo el punto final, kero otruna vez, repetar lo ke dishe en un teksto miyo ke eskrivi antes unos, kuantos anyos. “Una de las Mitzvot ke la Tora mos preskrivyo por el Diya de ROSH HASHANA, es sintir el “Shofar”. A kada vez ke sintimos esta boz, dizimos “Hayom Harat Olam”… En Rosh Hashana selebramos la “Kreasyon del Universo”. Sueto ke la anyada mueva seya manadera de Favores Divinas, de Paz i Repozo para el mundo entero. AMEN.. SHANA TOVA –HAG SAMEAH.
