El pasar de la manseves a la vejez es tan avagarozo ke, jeneralmente no mos rendemos kuento. Es komo el otonyo, kon las manchas amariyas o ruvyas ensima las ojas de los arvoles, tomando el lugar del enverano, antes de empesar su viaje verso el invyerno. Komo las ojas, i el ombre empesa kon un poko de grizo en las syenes, rugas, kanseryas, rememorar el pasado, kuando olvidar, kuando akodrar i kontar rekuerdos inolvidavles. Por no emplear el byervo “Envejeser”, diremos “Entrar en anyos” es bivir esta dilemna i alora, le puedemos suetar la byenvenida!… En realidad, envejeser, es el ritmo natural de la vida, una etapa normal en la egzistensya del benadam.
Keridos lektores, en el presipyo del mez de Septembre, se selebra el diya de los avuelos. Malgrado lo ke aze prezumir este byervo, todos los grande paryentes no son aedados. A la kontra, ay ke se pueden dezir komo ermanos grandes de sus ijos. Mansevos o menos mansevos, a todos los avuelos, les mando mi amistad, a la okazyon de este diya. “ Entrando en anyos…o envejeser?”…En los Estados Unidos, el diya de los avuelos se fyesta desde unos, kuantos anyos. Esta selebrasyon no es muy konosida aki, ni popular komo los diyas de la Madre i del Padre. Tambien es relativamente mueva.
Deke manera se puede onorar estos keridos nonos i nonas? Muncha djente konsideran este djenero de selebrasyones, komo un preteksto para gastar i mizmo las kritikan. Personalmente yo no esto de esta opnion. A la kontra, penso ke estos diyas espesyal, estas selebrasyones inosentes, son okazyones de aserkar los miembros chikos o grandes de la famiya. Un manadero de felisidad…Vinyendo al gastar, no ay menester de regalos grandes i karos. A mozotros avuelos, mos abasta ser akodrados i estar endjuntos kon muestros ijos i inyetos, no solamente en diyas espesyal ma, en kada okazyon.
A propozito de inyetos… Kualo pensan eyos de sus gran paryentes? Bueno, antes de todo, son sus amigos, sekretores i se entyenden muy byen, malgrado la grande diferensya de edad. Los nonos konosen sekretos (naturalmente inosentes!), ke los chikos no tyenen ozadiya de dezir a los paryentes. Asigun los inyetos, los nonos tyenen mas muncho entendimyento i induljensya, i sovre todo, una pasensya sin limito…
No solo pasensya, tambyen tyenen fuersa!, para djugar, para kontar konsejas, al koste mizmo de olvidar la komida en el orno!… Son amigos inkomparavles, ke reushen esto todo, porke al pareser tyenen mas muncho tyempo. Tengo dudas sovre el tyempo, porke esto tomando en konsiderasyon ke todos los avuelos no son aedados. Ay una jenerasyon absolutamente manseva, ke tyenen inyetos i ke lavoran, ke tyenen okupasyones i aktividades sosyal.
No importa la edad, los Nonos i Nonas son de un grande ayudo para los paryentes, en diversos domenos. La kestyon de edukasyon puede kavzar en vezes malentendidos i kritikas o komentaryos. En vezes son en kontradiksyon sovre la manera de edukar los chikos. Lo ke deranja los paryentes, es la muncha kara (şımartmak) ke los grandes dan a los inyetos.
Portanto de otra parte, yo penso ke aktualmente, a kondisyon de kedar en el kuadro de syertos limitos, los paryentes estan akordando a sus ijos una ancha libertad, ke no konosimos mozotros a muestros ijos. Me esta paresyendo ke la jenerasyon muestra, era mas rigoroza, por no kalifikarla de intransijente enverso los ijos. I oy, ke grande kontradiksyon, muestro komporto induljente, tolerante, kon los inyetos!.. Reelmente, kuryozo i enteresante!…
Los avuelos son la sezudeza, la eksperyensa de la famiya. Meresen kerensya, kudyo i sovre todo, un grande respekto.
