Una boda mırakuloza en Antakya

Una boda mırakuloza en Antakya

La semana ultima tuvimos la shans de asistir a la boda fabuloza (olağanüstü)  del ijo de mi primo (ke este en ganeden) en Antakya.

Si vos kero dar un rezumen (özet) de Antakya; vos puedo dizir ke kuando entramos a esta sivdad istorika, mos apersivimos del rio “ASİ”  (Asi nehri) ke diviza la sivdad en dos partes.

A la syedra del rio la vyeja sivdad de Antakya i a la derecha del rio es la mueva sivdad de Antakya.

El entorno es yeno de montanyas i a los bodres las kazas tipikas, las kalejas estrechas ma muy atraktivas (çekici) i enteresantes.

Munchos lugares de vijitar, ma lo mas muncho ke me chapteo al ojo fue el respekto i la buendad kon la djente ospitalyera (misafirperver) ke mos estavan arisivyendo kon grande entuzyasmo.

Lo mas emportante es ke en Antakya no ay un apartamyento (ayırım) de relijyon. Todos estan bivyendo komo una grande famiya.

En la sivdad mueva, apartamentos muevos, kaminos anchos entornados de parkos yenos de arvoles i rozas, todo ordenado i limpyo. La populasyon muy respektuoza, la sirkulasyon de las arabas i de las personas kon un orden ekstraordinaryo. En el enterval de unos kuantos dias ke pasimos aya, no vide una polisiya de trafiko, ni las luzes del trafiko, ni sinti un chuflete.

Todos los envitados ke vinyeron de las diiferentes sivdades de Fransya komo; “Lyon”, “Grenoble”, “Paris”, de “Estambol” i de “Mersin” se toparon noche de shabat en la sinagoga de Antakya.

Una sinagoga chika, kayente, grasyoza i muy entima. Shabat demanyana todos ya estavan un poko emosyonados a kavza de la boda ke i va ser alhad midi.

Despues de la orasyon ke todos endjuntos kantaron

“Mizmor le David”, mos asentimos en las mezas ordenadas kon manteles blankos i rozas en la guerta de la sinagoga para dezayunar. La seuda estava muy savroza kon las spesyalidades de Antakya.

Despues de midi asistimos a un torno kon un giador (rehber) para vijitar el museo de mozaikas i las kalejas estrechas istorikas de Antakya.

Fue un torno yeno de nostaljiya.

Enfin alhad demanyana en el otel ke mos kedimos toda la famiya, todos estavan muy egzaltados.

Las mujeres okupadas kon los kuafores para los kaveyos i el makyaj, los ombres vistyendosen las kamizas blankas kon las gravatas. Ya esta todo djusto.

A las oras 13.00 de midi todos vistidos de kolores diferentes, muy elegantes, mos metimos al kamino para iyir a la boda.

La guerta i la sinagoga estava dekorada de tules (tül) blankos i de rozas multikolores.

Entre los envitados aviya el governador (vali) de Antakya kon su mujer, el presidente de la munisipalidad (belediye başkanı) kon su mujer, el komandante del rejimento (alay komutanı) i su mujer, el direktor de seguridad (emniyet müdürü), el papaz katoliko, los jurnalistos. Todos empesaron a vinir a poko a poko i se asentaron en los lugares apropriados.

El presidente de la komunitad djudiya de Antakya “Şaul Cenudi” kon mi marido “Meir Gaon” dyeron la sinyifikasyon de la boda kon el senso de la orasyon “Anoten”, al governador i al presidente de la munisipalidad.

En primero el novyo, en medyo de su tiyo i de su madre muy elegantes, el un pasha kon su kara novle (asil) un luzyo, vinyeron a la teva i pasaron a sus lugares. De detras la madre de la novya i la novya kon kara riyendo allado de su padre arivo kon el fostan blanko. Dike  paresiya a un pasharo bolando de felisidad (mutluluk).

El Hazan “Natan Siliki” kon su boz maraviyoza de seda manyetizo (büyülemek) a todos.

Las famiyas “Asa”, “Ülçer”, “Çiprut”, “Gaon”, “Eskenazi”, “Natan”, “Kohen”  i los amigos de Fransya partisiparon i se formo un koro natural.

Rav. Nafi Haleva izo una avla sinyifikativa en dando a entender la formasyon de una famiya, ke la baza es la boda entre dos personas ke se keren byen.

En esta boda yena de nostaljiya i emosyon le echaron “Tallet” a la novya i novyo.

Todos sintyeron (hissetmek)  la esplendor (ihtişam) de akel momento del tallet kon modestiya, sin hadras ni baranas, esta vista maraviyoza.

Kaliya ver el entuzyasmo (coşku) de las 180 personas ke asistyeron a la boda!....

Konosidos de diferentes paises, sivdades, famiya, amigos, mansevos, todos kontentes, riyendo, avlando, kon alegriya travandosen fotografias.

A la nochada mos fuimos a un restorante famozo de la sivdad.

Kuando empeso la muzika; “Meri i Samuel” salyeron en medyo i baylaron muy grasyozos.

Sus amigos i la djente estavan dando una felisitad  i una atmosfera kayente. Este modo pasimos una nochada muy alegre en esta sivdad istorika.

Eyos ke tengan byen, i mozotros tambyen, ke esten orozos fina la fin.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın