Un tiempo aviya judios en Ejiıpto

Dora NİYEGO Judeo-Espanyol
19 Temmuz 2012 Perşembe

El eskridor ejipsiano, Denise Telio Douek, en una lektura ke dio en la Sinagoga Bon Souvenirs en Paris, konto a los yahites la istoria de los judios de Ejipto.

‘Kada Pesah, kontamos el egzodus de los judios de Ejipto.

Deke los judios tornaron de muevo atras a Ejipto.Una de las razones es ke Ejipto era la tierra ande los judios ejipsianos puedian ganarsen la vida. Los dokumentos estan amostrando ke uvo una prezensia kontiual de judios en Ejipto. Munchos judios ke fuyeron de la engizision de Espanya, en sus kamino a Turkiya, se establiseron en la sivdad Livorno de Ejipto.

l rey de Ejipto, Fuad, fue el protektor de la komunidad judia. El permetio de avrir organizasiones judias, grupos de mansevos, i eskolas de la Alliansa. En el anyo 1940, aviya 100 000 judios en Kairo, i en Aleksandria. Ma, pokos judios tenian kazas i teranos porke en un kavzo urjente, era difisil de venderlos. Lo mas de los judios eran merkaderes, i bankeres. Tenian fabrikas de tekstil, de mobles, i de munchas otras endustrias. Tenian parteneres de negosio, muslumanes i kristianos. Los arabos preferavan lavorar kon los judios porke eran onestos, i se komportavan mijor kon eyos. El ospital judio en Kairo, i un otro ospital en Aleksandria, eran unos de los mijores ospitales.

Los judios eran permetidos de estudiar en las eskolas arabas, ma munchos judios preferavan estudiar en las eskolas privadas fransezas i inglezas. Las eskolas de la Alliansa tomavan elevos de todas las relijiones. La komunidad judiya teniya kazas por los viejos, por los orfelanos, i ayudavan a los menesterezos.

Duspues ke eskaparon el lise, los ijikos puediyan irsen a la Universidad Amerikana en Kairo, o puedian irsen a Angletera, Fransia, o los Estados Unidos, para estudiar. Duspues ke eskapavan los estudios, tornavan a Kairo, komo doktores, farmasienes, avokatos, profesores, o enjeniores.

Pokas mujeres mansevas lavoravan afuera de kaza. Las ijikas se kazavan muy mansevas. Lo mas eran kazamientos kon entrevistas. El padre de la novia dava una dota al novio, i el montan de la dota se eskrivia en la ketuba, i en kavzo de divorso, el mansevo era ovligado de dar la dota atras. Kazamientos kon otras relijiones eran muy ralo.

La majorıta de la komunıdad eran sefaradis kon sus proprias tradisiones. Los servisios de las sinagogas eran ortodokso. Los ombres se asentavan abasho, i las mujeres ariva, en la azara. Un haham aparejava los ijikos por la bar mitzvah. Las ijikas resivian edukasion judia en sus kazas.

La vida sosyal de los judios no era diferente de los arabos. Se ivan a los restoranes, teatros, sinemas, klobes. Todos suivavan la moda.

Ma, esto no keriya dizir ke no teniyan restriksiones. Mezmo los judios nasidos en Ejipto no puedian tomar nasionalidad ejipsiana.  Puedian tomar la nasionalidad de sus madres u padres, komo nasionalidad franseza, ingleza, grega etc. Si los padres i madres no tenian nasionalidad, eyos kedavan sin nasionalidad. Los judios ke tenian una nasionalidad, devian de renuvelarla para pueder kedar en Ejipto.

Los judios no tenian el dirito de votar. Tambien no puedian azer todo modo de ofisio.. Si kerian viajar, devian de tomar un dokumento de viaje. Devian tambien tomar viza para salir del pais, i para pueder entrar de muevo.

Ejipto no teniya demokrasia. Los situayenes no teniyan el dirito de avrir un otro partido komo opozision al governo. Aviya sansur a la prensa. Las letras i los telefones eran entervenidos. Los judios ya savian ke estan suivados por la polisia sekreta.

Metiamos las mezuzas al enterior de muestros apartamentos. La estreya de David la guadravamos ariento de muetras vistimientas. No puediamos kritikar el rejim, o el governo.

Ma, mezmo kon estas restriksiones, biviamos orozos.

Kon la kreasion del estado judio, muestra situasion troko. Fuimos ovligados de serrar todas las otganizasiones judias. Empesaron a maltratar a los judios. Judios empesaron a emigrar a Israel. Ma, la majorita kedaron en Ejipto, esperando ke la situasion va trokar. Ma, malorozamente, el nasionalizmo ejipsiano i el fondamentalizmo pujo de dia en dia.

En el anyo 1952, uvo munchos revoltos. En Kairo, miles de personas salieron a las kayes, i kemaron las kazas i los magazenes de los etranjeros. Si eras judio i etranjero, mas grande mal.

En el 26 de Julio, 1952, una djunta militar lo abasho al rey Faruk, i deklaro la republika. En el Roshhashana del mezmo anyo, dos ofisies de la armada vinieron a las sinagogas i mos trusheron (los saludos de pas para el anyo muevo) en el nombre del governo ejipsiano.

En el anyo 1956, una de las konsekuensias de la gerra de Suez fue la fin de la komunidad judia en Ejipto. Fuimos ovligados de salir de Ejipto kon muestras validjas, i sukuenta pound por persona. El egzodus empeso de muevo. Ande se ivan a ir, kual pais los iva akseptar…

Devian de sinyar un dokumento, diziendo ke salieron de Ejipto volontariamente.

Dingun pais evropeano no los aksepto. Emigrasion era avierto solo para Kanada, Australia, Brazil, i los paizes de la Amerika Latina.

Empesar una vida mueva en un muevo paiz fue muy difisil por los judios ejipsianos. Mos estavamos demando unos a los otros si somos refujianos ejipsianos. La repuesta era No. Eramos judios ejipsianos ekspulzados de Ejipto, i eramos ovligados de empesar una vida mueva en un otro paiz.

En muestros muevos paizes, adjentas, komunidades judias, sinagogas, mos ayudaron muncho, mos ofrieron echos. Fue una grande satisfaksion por mozotros ver Judios Ayudar Judios.

Agora, es muy triste de ver ke la jenerasion mueva de Ejipto, nunka no konosieron un judio. Los solos judios ke vieron son los de las karikatures.

Oy, bive solo 200 judios en Kairo, i 40 en Aleksandria. Los mas viejos kedaron en Ejipto. En poko tiempo, lo ke el Faraon izo se va repetar. No va kedar mas dingun judio en Ejipto.

Los judios ejipsianos perieron un modo de vida, i sus kazas. Sus famiyas famiyas fueron dispersadas en el mundo entero, komo todos los judios de la diaspora. Ma nunka no perieron sus identidad. Agora se entegraron en las komunidades judias de otros paizes.

Bindicho el Dio, oy, los judios ejipsianos, i sus kreaturas estan biviendo en buen estado en diferentes paizes, i se estan enfuertalesiendo den dia en dia.