La ventana de vuestra ermana: UN DIA DE SOLIDARIDAD EN LA “KOLONI” DE BURGAZ

Myerkoles el 16.07.2012; las mujeres volontaryas  de todas las organizasyones (kurum) i asosyasyones (dernek) djudiyas de muestra komunitad izyeron una vijita de solidaridad (dayanışma) a la “Koloni” en la isla de Burgaz.

La koloni es una kaza de vakansas para las kriyaturas de 6 a 12 anyos, ijikas i ijikos ke vyenen aki para pasar 15 dias u un mez i gozar del enverano en konosyendo las islas, entrando a la mar i azyendo munchas otras aktivitades. Entremientes; kada dia ay una koza diferente de azer. Lesones de ingles, de pintura, de estatua (heykel), iyir a kaminar kon barka, entrar a la pisina, komer, bever, azer amigable kon los otros i tener un buen komporto kon todos.

Kada enverano kaji 50 a 60 kriyaturas vyenen aki kon grande plazer. Los dirijentes i mas i mas la direktrisa se okupan kon muncha pasensya i kerensya para ke tornen a sus kazas kon felisidad (mutluluk).

Ya savesh keridos lektores ke ay munchas organizasyones en Estambol ke se okupan; de los chikos, mansevos, aedados, defektuozos (özürlü), de los ke no tyenen dingunos (kimsesiz) i de todo modo de koza. Este lavoro es muy sakro  porke se esta realizando solamente kon volontaryos i volontaryas.

Para dar un apoyo moral i materyal; todas las reprezantantes de diferentes lugares se toparon en la koloni para komer, diskutir unas kon las  otras sovre lo ke estan azyendo, trayer regalos a los chikos i pasar un dia diferente.

Despues ke eskapimos de komer; la psikologa “Gila Ancel ŞERİTÇİOĞLU” izo un test de komunikasyon (iletişim) i la forma de aksyon (eylem biçimi) ke tenemos kon el den frente. Eya realizo este test kon las kolores blu (mavi), vedre, amariyo i kolorado. La manera de komporto (davranış) ke tenemos kon muestra famiya, kon muestro entorno oy en dia, i kualo asperamos del den frente sovre los sentimyentos (hisler). A la fin de esta eksperyensa (tecrübe), eya mos izo una analiz de karakter asigun las kolores dominantes ke tenemos.

Kada kolor tyene una karakteristika (özellik) diferente en frente del komporto.

 Por egzempyo; el komporto de la kolor blu es; responsable (sorumlu) ke le plaze una vida ordenada (düzenli).

La kolor vedre es pasensyoza, sensible (duyarlı), i delikado (düşünceli).

El amariyo es; apasyonado (tutkulu) i kere partajar todo para pueder reushir endjuntos.

El kolorado es deçidido (azimli), de fuerte veluntad (iradeli), korajozo i tyene la kapachitad de konvenser (ikna etmek) el den frente.

A la fin ke se komyo dulsuryas, frutas i se bevyo el  kafe; la presidente “Sara COŞKUN” remersyo todas las dammas de sus partisipasyones a este dia.

Fue un dia reushido i sentimental.

El Dyo ke mos ayege para kada anyo kon todos endjuntos. Syempre pujados i non aminguados.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın