La ventana de vuestra ermana: EL SEKRETO DE BIVIR KON FELISIDAD

Şeli GAON Judeo-Espanyol
25 Ocak 2012 Çarşamba

La moneda no es el uniko objekto ke traye la felisidad. Esta idea aparesyo en el mundo moderno ke; los ke son rikos biven un poko mas orozos de los ke no son, i esta felisidad provyene de un sentimyento de superyoritad para munchos dentre mozotros.

Los psikologos estan pensando sovre este sujeto ke; la felisidad; es kompensar todas las nessesitades de la persona.

Antes dos mezes meldi en una de las revistas de “TİME”; los rezultados de munchos ombres de sensya

(bilim adamları), ke izyeron munchas investigasyones (araştırma) sovre este sujeto enteresante.

Unos kuantos de estos rezultados son:

La felisidad no tyene dinguna relasyon kon las enfluensas ke mos imajinamos.

• La moneda? No tyene dingun raporto.

• La edukasyon? No tyene dinguna enfluensa.

• La intelijensya? No tyene dingun raporto.

• La manseves? Al kontraryo; las bushkidades (araştırma)

 mostraron ke; los aedados estan tomando mas muncho plazer de la vida ke los mansevos i se provo (kanıtlanmış) ke tyenen una tendensya (meyil) mas poko a la depresyon.

• El kazamyento? Sigun las bushkidades, los kazados estan

un poko mas orozos de los muchachos (bekar).

Bueno; kualo esta azyendo orozo a la persona?

Asigun las deskuvyertas, la kreensa en la relijyon esta azyendo pujar la felisidad de la persona.  Las personas kreentes estan rezistyendo mas fasilamente a las difikultades.

Los amigos, la mas grande melizina kontra la malor (mutsuzluk). Las personas ke tyenen relasyones kon sus amigos, aliados (dost), kon sus famiyas i el entorno estan mas optimistos i orozos.

Bivir kon felisidad traye estas aktivitades:

Tener relasyones kon amigos, repozar en kaza kon kalmo, arrogar al Dyo, komer, kaminar en el bodre de mar, meldar i munchas otras…..

Lo ke esta estranyo (tuhaf) es ke okuparse de los ijos, azer echo de kaza no esta trayendo la kontentes, el guste de bivir. Aser ke; a munchas personas les parese ke las kriyaturas son el orijen (kaynak) de la felisidad.

Bueno, todos pueden ser orozos?

Asigun de una investigasyon en 1996; una persona ke esta satisfezada (memnun) de su vida, depende 50% de su formasyon genetika.

Todos los psikologos se aunaron sovre tres formulas:

• Dar loores (şükretmek),

• Azer buendades,

• Azer el lavoro kon kerensya.

 Dar loores; eksprimir la kontentes, la satisfaksyon (memnuniyet) ke estamos tomando de la vida. Eskrivir i dizirlo esta enderechando la sanedad fizika (fiziksel sağlık), esta enaltesyendo el nivel de la enerjiya (enerji seviyesi), i esta aminguando (azaltmak) la kanserya i las dolores (acılar).

Azer buendades; vijitar una organizasyon de aedados, ayudar a un vizino, bushkar kon telefono a una granmama, esta pujando el grado del plazer.

Ni la moneda, ni la amor, ni el sol, ni la menseves!

Kerer de aryento muestro korason el lavoro ke estamos azyendo i dar la enerjiya kon kerensya; es  una de las formulas de ser orozos.

En la universitad de “Chicago” “Christopher Hsee” se entereso a esto i en la bushkida ke izo, en 4 titolos (başlık), mos dyo a entender las kavzas :

Deke no estamos puedyendo tomar las desizyones menesterozas para ser orozos?

Las 4 kavzas son:

• No gastar en vaziyo!

Kuando las personas estan organizando una fyesta, estan preferando todo lo mas karo.

• Ser los esklavos de la lojika (mantık).

Las desizyones lojikas son emportantes, ma eyas  mos arrovan la felisidad.

• No saver la valor de las kozas presyozas!

La valor la mas emportante es la enerjiya ke posedamos.

• Las kozas diferentes no son syempre kozas buenas.

Tener syempre munchas alternativas no aze orozo.

Para ke la vida seyga mas fasil kale deshar los prejuicios (ön yargı) i pensar syempre lo bueno.

Estar adjuntados kon todos los myembros de la famiya, serkanos komo leshanos, dar apoyo a los ke tyenen menester en todo modo punto de vista, ser kon kara riyendo, pensar syempre bueno, saver la valor de lo ke posedamos, tener kreensa en todo el puederoso  son los prensipyos de bivir orozos.

La Felisidad es; mirar, es tener respekto al den frente, es tener konfiensa, es chikas sorprezas (sürpriz) en la vida, es bivir el momento, i es tomar plazer de las kozas chikas.

La Felisidad es;  la primera luz, la klaredad del dia.

La Felisidad es; el kareso de una madre, la mirada de un padre, i la riza de una kriyatura.

La Felisidad es; tener tolerensya i pardonar al den frente.

La baza de la felisidad es; kontentarse (yetinmek) de poko i ser lo ke soj (kendin olabilmek).

Ke toda muestra vida seyga yena de Felisidad!...