REPUESTA DE MARK FEMSOHN AL ARTIKOLO EN LA REVISTA LE MONDE

Keridos lektores, vos esto eskriviendo este artikolo (embiyado por muestro amigo Selim Amado) de la boka del eskridor, Mark Femsohn.

Este chiko pais, la grandor de dos departamientos fransezes, ma siendo el sentro del mundo, esta deranjando el mundo entero. Los ke lo detestan son, la majorita, los teokrates fandamentalistos, los diktatores, i los rasistos. Es verdad ke somos espesialistos de la meskla, i de la entegrasion de las kulturas de sien paizes diferentes. Mas de setenta por sien del puevlo son nasidos en esta tierra, son Sabras: eyos no son ashkenazi, o sefaradi, ma son solo israelianos. Les plaze komer el kuskus, el djahnun de Yemen, el kube de Irak, el medjadra de Iran, i puede ser, un poko mas manko, el pishkado gefiillte.

No empleyan kortezia, no saludan. No es porke son negros, son un poko retirados.

Se enkantan a la seremonia de los fransezes; bezarsem, tomarsen manos, saludar al pandero, dizir ‘komo estas’. Eyos merkan un pan, pagan, i duspues, esto es todo. No ay tiempo para estas kortezias. Son grosieros ma no son endiferentes.

En Fransia, en Beljika, o en otro lugar, por siguro ke te dizen ‘Buenos Dias’ i te bezan, ma kuando ay una ataka en la kaye, aboltan la kara, i miran a sus kaminos.

Aki, en muestro pais, en una ataka, todos se meten en medio, el primer te ayuda, el segundo se va detras del ke te atako, i el treser se va a yamar a la polisia. Ande mozotros, de noche, las ijas se van a sus kazas sin espanto, dingunos no las deranja. En la kaye, en avlondo kon telefon, dingunos no mos arevata el telefon de la mano.

Esta semana, en Fransia, un tribunal kondamno por muevo anyos de prizion, un ombre ke atako una mujer ayedada para tomar su bolsa. El trenta por sien de estos ladrones son liberados duspues de una ora, i kon una sonriza en la kara. Si, en Fransia son muy kortezios, partikularamente kon los kulpantes.

Komo en kada lugar, i aki ay komportamientos antisosyal. Ma, aki puedemos organizar una manifestasion de 300.000 personas en una plaza de Tel Aviv, ma sin romper ni una vitrina, o sin azer un akto de violansia. Ya vitesh las manifestasiones de protesto sosial en la avenida Montaigne de Paris. No me esto puediendo imajinar lo ke se paso aya. Ya estomos viendo los danyos de las demostrasiones en Paris. Aki, las fuersas de seguridad kontrolan a la entrada de las demostrasiones, ma solo porke no ayga un akto teroristo, sino no ay menester ni de un polis para kontrolar las protestas.

Es verdad ke mos gritamos unos a los otros, ma tambien mos ayudamos unos a los otros.

En los supermarketes, pasamos delantre de la kola para pagar, azemos merkansias de todo, pasamos de la derecha, no damos sinyal en pasando delantre, kada uno es por si.

Ma, estas mezmas personas no deshan un vizino ayedado solo en diya de Shabat, o en las fiestas. Aki, los adolesantes, en las aktividades de las eskolas, deven de eskojer un servisio a la komunidad, seyga vijitar los hazinos, o bien ser volontario en Magen David Adom, o ayudar a la polisia.

Es un pais ande la kalidad de vida es muncho superior a munchos paises oksidantal, ma la situasion se puede deteriorarse enduna, en unos kuantos diyas. İ kuando afita dezgrasias, todos deshan el egoizmo i la groseria. Todos se detienen mano kon mano, se ayudan, se konsolan, todos se apoyan unos a los otros.

Me esto akodrando de un periodo militar, kuando afito una diskusion fuerte entre los soldados de muestra unidad. Entonses, mos yamaron a un lugar danjerozo. En indomos, un soldado empeso a kantar una kantika vieja, i todos empesimos a kantarla en koro. Los ke se aviyan diskutado unos kuantos puntos antes, estuvieron todo endjuntos fin ke se eskapo la mision. En este enterval, uno de mozotros fue firrido. El soldado ke se aviya peleyado kon el, presto koryo a trayerle ayuda.

No somos muy obedientes, no empleyamos muncha kortezia, tenemos la nuka dura, ma todo tiempo, mos ekskuzamos si somos kulpantes, estomos prontos a negosiar, estomos siempre prontos a azer konsesiones, ma a kondision ke muestra ekzistensia no seyga inyegada, ke seygamos reskonosidos, i respektados.

Dianda ay tantas kozas de dizir por un puevlo viejo de mas de 3000 anyos, i ke se izo de muevo una nasion de sesenta i tres anyos aki. Ma esto es lo ke keriya eskrivir oy, sovre mi pais, mi puevlo, por mozotros.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın