Alüminyum Hurda Geri Dönüşüm

ARRESİVYENDO el ANYO 5772 i las FYESTAS

ARRESİVYENDO el ANYO 5772 i las FYESTAS

Este teksto lo esto eskrivyendo en los ultimos diyas  del mez de Ellul, aparejandomos a resivir Tishri i las Fyestas. Ellul tiene la partikolaridad de ser el mez final  del kalendaryo ebraiko. Vyendo semana por semana, los “Diyas Temerozos”, aserkarsen... Diyas yamados “Yamim Noraim” i konsiderados komo una perioda de djuzgamyento, arrepentimyento o regretos...

El orijen de esta perioda ampeso durante el “Egzodyo” de los Djudios salvando del esklavaje  de Misraim. Vinyeron al Monte Sinay para resivir la “TORA”. En el 16 de Tamuz, kometyeron el grande pekado de la “Vakita de Oro”. Moshe Rabenu, abashando del Monte kon las primeras Tavlas de los “10 Komandamyentos” vido los Djudios en  idolatriya. A la vista de este renyegamyento, “Se ensanyo”, echo las “Tavlas” de pyedra i las rompyo. Era el 17 de Tamuz (*).

En el primo de Ellul, Moshe Rabenu fue “Ordenado” de suvir al Monte Sinay para resivir las sigundas “Tavlas de la Ley”. En el 10 de Tishri abasho kon el sigundo set de los “10 Komandamyentos”. Esto era la sinyifikasyon del pardon “Selesto”  verso su puevlo. Este diya de 10 Tishri fue dezinyado komo “Yom Kipur”, diya de grande pardon. Desde akel tyempo, los diyas entre 1 Ellul- 10 Tishri fueron una peryoda espesyal, de egzamen de konsensya, de “Teshuva”, de pedronansa. Por esta razon Ellul es dicho ser “Mez de oportunidad” i de piadad: “Hodesh Harahamim”... En Ellul, el Shofar de las orasyones de demanyana mos izo akodrar ke Rosh Ashana i Yom Kipur estan serka.

En el presipyo del anyo pasado, en estas fyestas, izimos la promesa de amijorearmos. En ke grado reushimos? Es ke por una razon o otra, mankimos a muestra palavra? Malgrado todo, si izimos yerros, faltas, o puede ser mizmo pekimos, El Todo Poderozo mos pedronara si muestro arrepentimyento es sinsero. Desde el “Rosh Hodesh” de Ellul, el Djudio se apareja (o deve aparejarse??) kon sinseridad a un analiz i interrogasyon  personal, a una oto-kritika . Deve azer este egzamen bushkando remedyos de adovar (si se puede dezir ansi) sus faltas o yerros. En una manera, es komo revizar su komporto myentres el anyo entero i azer el “bilanso” moral suyo.

Rosh-Ashana, Yom Kipur, Suka i Shofar... byervos de los otonyos de mis 7-8 anyos... Teniyan para mi una sola sinyifikasyon. Era para mi la fin del enverano, ir a la eskola. Poko despues, grasyas a mi kerido Nono (de b.m) me ambezi... El mez de Tishri es mez de orasyon, de pardon, ma es tambien mez de fyestas i alegriyas. En Rosh-Ashana fyestamos la kreasyon del Mundo. De este punto de vista difera de las otras fyestas djudias ke selebramos o komemoramos un evento istoriko.

Aki kero sitar unas, dos linyas ke tomi de un manadero anonimo: “Rosh Ashana, literalmente la kavesa del anyo, es el Diya de Djustisya. Akodraremos syempre este prinsipyo establesido por los Djudios, antes miles de anyos. LİBERTAD i DJUSTİSYA son la baza, sin lakuala dinguna nasyon puede egzistir…”. Los Diyas redutavles (Yamim Noraim) konosyeron grande alegriya i momentos de grande entuzyazmo. Fue en Rosh Ashana ke tuvo lugar el estrenamiento del “Templo de Yerushalayim” por Shelomo  Ha Meleh.

Una de las Mitzvot ke la Tora mos preskrivyo por el diya de Rosh-Ashana, es de sintir el Shofar. A kada vez ke lo sintimos, dizimos: “Ayom Harat Olam”... Oy mozotros selebramos el evento ekstraordinaryo de la kreasyon del Universo... En estos diyas Santos rogaremos  ke la mueva anyada seya manadera de favores divinas, de salud, de prosperidad i lo mas importante de paz i repozo para el mundo entero.  Amen. Shana-Tova – Hag  Sameah.

(*)-Taanit de “Shiva Asar Betamuz”.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın