Alüminyum Hurda Geri Dönüşüm

De lag baomer a shavuot

Despues ke eskrivi mis rekuerdos sovre Lag Baomer, era muy natural eskrivir por Shavuot... Una de las tres grandes fyestas, kon Pesah i Sukkot.

De lag baomer a shavuot

 Eskapando la “Sefirat Omer” de 49 diyas, en 6-7 Sivan,oganyo 8-9 Junyo, estamos selebrando esta fyesta ke se yama tambien “Hag Habikurim”. Es el diya ke Moshe Rabenu resivyo la Tora, en el Monte Sinay. “En este Diya abasho el D. al Monte de Sinay a dar la Ley a su Puevlo Yisrael... Asigun la Leyenda, David a Meleh muryo en Shavuot. Es una de las razones de meldar la  Megila de Rut en Shavuot, syendo ke David era el desendyente de Rut la Moavita...”(fin de sitasyon). 

Mis penseryos se fueron de muevo a mi kerida Madre (de b.m) komo syempre en este diya espesyal. Otomatikamente me yevaron otruna vez a mis chikos anyos, kon un sentimiento de eskarinyo i de nostaljiya. Puedo dizir ke este teksto se va azer de si para si, asigun me van a dirijar mis rekuerdos, mis penseryos i mi pendola...

En akodrandome de akeyos anyos, muy frekuente nombro dos lugares. Galata, ande bivimos un syerto tyempo  djuntos kon mis avuelos paternal. El sigundo lugar es  Tekirdağ, ande pasava mis enveranos.  Ayi bivi diversas etapas de mi vida kon mis avuelos maternal. Sus filozofiyas, sus maneras de aserkarsen a muestras tradisyones, a la Relijyon, me influensaron tanto, ke oy en diya, despues de mas de  70 anyos, las tengo kon toda sus freskor en mi memorya i rekuerdo. Tambien mi Madre, bastante tradisionalista, perkuro a konservar estas tradisyones i transmetermelas, a lo menos una partida.

Espesyalmente los anyos 41-44 fue la perioda... komo ke diga? La mas ajitada i estranya de mi chikes. Komo lo tengo ekspresado munchas vezes, mi padre estava azyendo su servisyo militaryo (20 Klasas). Tambien, en mis eskritas  avli de las estrechuras, de la mankura de syertas kozas, espesyalmente de asukar. De sorte ke, afitava ke mi Nona o mi Madre no pudiyan azer las dulsuryas asigun lo dezeyavan. Seya la bimbriyada de Purim, la almendrada (masapan) de Pesah o el dulse de mansana de Rosh Ashana...

Ma, el enverano del 42, mi Madre mos estava rezervando una sorpreza. Asigun eya, era inadmisivle (kabul edilemez) de pasar la fyesta de Shavuot, sin azer el tradisyonal “sutlach de aroz”... Kon este eskopo invyerno entero estuvo ekonomizando a la eskondida! (gizlice) pokas, pokas kantitades de asukar. Dunke, Shavuot ya estava en la puerta, i demas, la Primavera de akel anyo sintimos rumores (rivayet) dizyendo ke los soldados rezervistos ivan a ser liberados en serka. Estavamos asperando kon kuatro ojos, i kada sonetido de la puerta, kada soneriya estavamos koryendo a avrir...

Mi Madre kon la sukar sorpreza, se estava aparejando a azer este sutlach, ke le plaziya tanto a mi Padre. Azer dulsuryas de leche es una tradisyon de Shavuot, i nunka mankimos a esto. Komo se save, el otro nombre de Shavuot es “Fyesta de leche i  miel”. Finalmente mi Madre izo el sutlach. Demanyana de mued, mi Nono se fue al “Kal de los Edirnelis”, aktualmente “Schneidertempel Sentro de Arte”. Era muy serka de muestra kaza. Lo asperimos i en el dezayuno mo lo komimos el sutlach, ma un poko desganados, deziluzyonados. El Papa miyo no aviya vinido...

Anyos pasaron... Despues de la Aliya de mis djenitores mos fuimos munchas vezes a Israel en Shavuot. Mi padre i mi marido viniyan de la Singoga, i komiyamos las borekitas de berendjena i el sutlach delisyozo ke aziya mi madre, i ke nunka reushi a azerlo komo eya... Oy, en este diya espesyal, otruna vez la esto nombrando en sintyendo su absensya. Ke su alma repoze en paz, Amen...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın