İavlo el Kriyador a Moşe, avlo a los ijos de İsrael, varon o mujer kuando izyeron alguno de todos, los pekados, falsando falsia kontra Dyos. I akea persona fuere kulpoza atorgaran sus pekado ke izyeron, i tornara su kulpa enteremente.
De estos versetos nos enbezamos lo ke kere dizir la teşuva, tornar a el kamino dereço.
De los biervos ke meldamos en el verseto “i atorgara su kulpa enteramente” entendemos ke la primera kondisyon de la teşuva es: atorgar la kulpa. Si la persona peko i vino kontra a alguna enkomendansa ke deviya de azer o de no azer, savyendo o no savyendo i se arepintyo de lo ke izo; deve de dizir peki, reveyi, enmalesi. Estos biervos son biervos de repintimyento. Deve de verter lagrimas, de ekslamar, sovre todo lo ke izo. Deve de aprometer de no repetar el yerro ke izo.
En el livro Hovat Alevavot, meldamos sovre el sujeto de el arepintimyento: İjo de ombre mira i apronta komanya para el kamino ke vaza salir, no detadres. Todo tyempo ke estas en vida i en tus fuersas, no digas amanyana enpeso, komo meldamos en los perakim, no digas kuando tendra tyempo me embezare, no seya ke no tendras tyempo.
El arepintimyento lo puedemos entender kon un ensemplo. Un rey estimava i amava a los konsejeros ke teniya en su deredor. Unos de sus konsejeros entraron a el trezoro i rovaron oros i platas ke se topavan ai. El rey ke sintyo el kavzo se ensanyno, ma de la amistad ke teniya kon eyos, kito un pregon dizyendo ke eçen a el riyo todo lo ke rovaron ke vengan onde mi ke demanden pardon. Yo los vo perdonar. Lo ke amavan a el rey mas ke el oro i la plata, eçaron todo lo ke rovaron a el riyo i vinyeron a demandar pardon de el rey. Uno de eyos, no eço ninguna koza de el rovo, i vino delantre de el rey tenyendo en su mano el rovo ke rovo, i lo apeno el rey. Este ensemplo nos da a entender. El Santo bendiço el tyene una grande estimar kon nozotros si nozotros eçamos nuestros pekados en las onduras de lamar. El devista nos perdona a nozotros.
