Desde ke empesi a eskrivir en esta pajina, kada anyo tuve komo uzo de azer un teksto sovre la Primavera. Asigun el kalandario, ay unas kuantas semanas ke estamos aryento de esta sezon. Ma no pudimos ver komo syempre su egzaltasyon achakes del aver bastante fresko, afilu se puede dizir yelado. En estas kondisyones, parese ke asta oy la mano no me se kijo ir a eskrivir mi tradisyonal! teksto de arresivo de la mueva sezon.
Es verdad ke unas demanyanadas mos espertimos kon un timido rayo de sol ke reusho a pasar a traverso los pandjures. Mos gustimos pensando ke iva ser un diya a lo menos tivyo. Ma, los diyas klaros fueron muy ralos. En jeneral, pasimos un mez de Avril enuvlado, luvyozo, yelado i el termometro djugando entre los 9 o 10- 12 grados.
El 23 Avril era un diya de fyesta nasyonal ke mas muncho se nombre komo la “Fyesta de las kriaturas”. Las eskolas azen paradas, demonstrasyones en los estadyumes. Fue de mizmo i oganyo naturalmente. Kuanto a mi, me izo pena de ver en la T.V los ninyos, yelarsen, los mas chikos afilu yorando. Ma de otra parte, uvo komo kada anyo grupos de chikos de diversos paises ke vinyeron a Turkiya. I estos grupos, kada uno kon vestimyentas de kolores a kolores ekspozaron sus bayles nasyonal. Orozamente ke estas aktividades se izyeron en espasyos serrados.
Malgrado las negativas kondisyones meteorolojikas, espero ke no peryimos muestro optimizmo i buena umor. Ansi ke ansi, la Natura esta sigiendo su ritmo. En fin de kuento, Tadrioza o no, la Primavera esta aki. Para unos la Primavera viene kon las margaritas en los kampos, en las kolinas. Blankas, amariyas estas flores mos dan plazer simbolizando el espertarse de la Natura.
Dizen ke en Estambol, sin ver los arvoles de “Erguvan” kon sus chikas flores roz-lila, no se puede dizir ke ya vino la Primavera. Basta un torno de vaporiko en el Bosfor para ver estos arvoles. Oganyo no tuve la okazyon dayinda de verlos. Esto pensando ke ya kedi tadre porke, parese ke el “Erguvan” perye sus flores muy presto. Por diversas razones ke se adjustaron i a los aparejos de Pesah, ay muncho tyempo ke no paseo en el Bosfor.
No konosko el nombre de esta planta en judeo-espanyol. Tengo sintido ke es konosida por los estranyeros komo “Judas Tree”, lo ke kere dizir el arvole de Yehuda. Egziste i una leyenda sovre el evento ke fue la kavza de la kolor de sus flores. En desparte, fue la kolor ofisyel del Imperio Bizantino. De ande, a ande?!!
Otra flor de la Primavera es la “Tulipa”, uno de los simbolos de muestra sivdad. Vemos en munchas partes de Estambol esta flor kon sus formas i kolores diversas. Kada Primavera se aze aki un Festival al nombre de la Tulipa. Esta flor en la Istoria del Imperio Otomano dyo tambien su nombre a una epoka.
Mizmo si fue un poko tadre, estamos bivyendo diyas sin igual, ma pasajeros. Los fransezes dyeron a esta sezon el nombre “Le Renouveau”. Reelmente es el renovelamiento de la Natura, ke se espyerta de un largo esfuenyo de invyerno.
No puedo saver komo va ser el tyempo kuando el lektor va meldar estas linyas. Fresko o sielo eskuro i luvyozo?... Ke importa?!! Komo lo dishe mas arriva, no permeteremos ke syertos impedimientos aminguen muestra buena umor. Ansi ke ansi estamos en el mez de Mayo i esto deve ser una buena razon de sonreir a la mueva sezon. Si mi memorya no me enganya, me parese ke el ilustro Nietzche tiene dicho: “El umano teniendo tantas penas, se sintyo ovligado de deskuvrir o puede ser de inventar la Alegriya i la riza para kompensar sus amarguras...”
Keridos amigos, kon sus flores i pasharos ke la mueva sezon seya manadero de buen oguryo para todos. Enveranada buena...
