Morar endjuntos

Coya DELEVİ Judeo-Espanyol
15 Aralık 2010 Çarşamba

(Koabitasyon)      

Syempre ke mos topamos kon amigas tenemos un sujeto de diskutir. Esta vez fue sovre muevos kazados morando kon los paryentes. En jeneral kedimos d’akordo sovre la difikultad i los problemas ke provoka a las dos partes ets... Ma, komo munchos kavzoz, ni en esta kestyon no kale jeneralizar. Yo so kontra la koabitasyon, ma la situasyon ekonomika i syertos uzos tradisyonal ke egzisten afilu oy en diya (mizmo si son ralos), no permeten de avrir una kaza aparte. En estos kavzos kaji ovligatoryos, lo mijor es de provar un arranjamiento.

Yo no mori kon esfuegra. En las famiyas sefaradis muy tradisyonalistas, era komo uzo, o puede ser una ovligasyon, el ijo deviya morar kon su famiya. Lo ke viene a dizir “la ermuera kon la esfuegra”. En una manera se deviyan somportar. La nosyon “somportar” no me plaze i la emplei sin kererla. Me parese lo djusto es , todas las dos partes deven mostrar una buena veluntad i akomodarsen. Siguro, para mi es muy fasil de dizirlo!!. Ay i la sistema de “meza franka”, medyo mal!...

Mizmo si son ralas ay eksepsyones. Personalmente konosi famiyas ke reusheron a alkansar una syerta armoniya en la koabitasyon. Es la vanda pozitiva. Ay i la vanda negativa ke es la realidad de la vida. Ke lo keramos o no, devemos achetar esta realidad. Es difisil de enkontrar muy frekuente el tablo pozitivo. Ansi, diskutimos i kada una de mozotros dimos muestra opinion bazandomos sovre eksperyensas personal o observasyones.

Es muy posivle ke una mueva kazada no sepa gizar al presipyo. Esto no es grande problema si biven solos. Ay vezes afilu ke se burlan de la komida kemada o mal kocha. Aki, veremos lo ke pensa la sinyora esfuegra?!! (orozamente no todas). Muy probavle se va amanziyar por su ijiko ke era tan bien mirado en la kaza de su madre!!.. Esto munchas vezes ez la senteya ke aze ampesar una gerra, aluzyones, echadikas!!, byervos a medyo pronunsados ets... Si la ermuera acheta los konsejos no ay problema. En kavzo kontraryo, si kere o no, el mansevo va mirar de defender ken??!!... Su madre o su mujer?... No kero ni imajinar el rezultado. Puede ser ke me esto yerrando!!.

Yo nunka bivi esto kuando ampesimos a morar solos en muestra kazika. Porke ya era eksperimantada en kestyon de mupak i rijir el nido. Afilu en kontinuando mis estudyos, mi madre (de b.m) bastante tradisyonalista, syempre perkuro a darme las nosyones indispensavles a “la ija kumplida”. En desparte, tuve otrun avantaje. Mas de dos anyos, asta ke nasyo mi ijo, morimos kon mis paryentes, lo ke kompleto mis konosensyas.... Esto fue una eksperyensa para mi i es ansi ke puedo dar mis puntos de vista sovre la “koabitasyon”.

Los mansevos, kon entendimiento, deven realizar ke de una manera, los grandes keren kalmo i trankilidad. Antes de todo los ijos deven achetar ke son mas o menos una kavza de trokamientos en la vida i uzansas de sus djenitores. Kada uno va tomar parte kon buena veluntad i takto, en los echos o los menesteres. La ija o el ijo de la kaza ande se esta bivyendo, deve azer mas demaziya esforso para amenguar los malentendidos, kon “politika” i “diplomasiya”. Esto lo esto afirmando a la luz de mis eksperyensas. Portanto, mis paryentes eran los mas dulses i avenidos padre i madre, en ganeden ke repozen Amen.

Vinyendo a los djenitores, deven akodrarsen sus manseves i deshar a los ijos mas intimidad, mas libertad i permeterles de vez en kuando de envitar amigos, salir a pasear solikos ets... En evitando kritikas i keshas, son los paryentes ke deven mostrar ke la maturidad i las eksperyensas son igual de avenimiento. Se puede avlar muncho mas, ma esto sigura ke todos ya tienen sus propias opiniones..