Galata

Galata

La semana ultima el sujeto de mi eskrita  era el apartamento istoriko “FREJ HAN”.

Oy vos kero avlar del sentro de “Galata”, ande se topava este edifisyo.

GALATA es el sentro riko sovre la istorya de Estambol. Puedemos topar en Estambol munchas fraguas ke apartyenen a la kultura djudiya i munchas rejyones ande bivyeron los djudyos muchedumbre (kalabalık). Se puede dizir ke era el lugar prensipal de los djudyos.

El senso (mana) del byervo “GALA” es leche en grego. Unos dizen ke el nombre de “Galata” vyene de las rejyones ke venden leche.

Otros dizen; ke puede ser este byervo vyene del byervo italyano  “GALADYO” ke es la abashada verso la mar.

De otra parte los katolikos eran yamados “GALUS” por los ortodokses, i otro punto de vista ke Galata era un kazal katoliko i se yamava “GALATEA” i ke el nombre de Galata vino de este byervo.

Los djudyos ke estuvyeron ovligados a emigrar de la Espanya, vinyeron en primero a Balat.

Galata era konosido komo la rejyon de los marineros (gemici).

En este sentro los djudyos se okupavan del komerso i empesaron a bivir serka de sus ofisyos. Fraguaron munchos apartamentos, sinagogas, hanes, pasajes i eskaleras.

Oy mizmo “Şair Ziya Paşa Yokuşu”; esta suvida era konosida komo la suvida de los djudyos “Yahudi Yokuşu”. El yokuş del Kal de los Frankos.

En el lugar ke se konstruiso oy el Metro; era la guerta de “Sarı Madam”; guerta ande se beviya çay.

La eskola djudiya fina antes 15 anyos se topava en este sentro. En el empisijo de la avenida (cadde) “Büyük Hendek” aviya el kal “Apollon” ke no egziste mas oy.

Me esto akodrando ke aviya la “Mahazeke -Tora” i mos ivamos kon grande plazer para ambezarmos antes 50 anyos. Nisim Behar (zihrono livraha) era el profesor de la Mahazeke- Tora i profesor de la lingua ebraika de la eskola “Bene-Berith”, kon el Sinyor Davit Aseo ke era el profesor en el liseo, i ke fue el “Grande Rabino” de la komunitad djudiya de Turkiya kaji 42 anyos.

La Sinagoga “Neve – Shalom”, la Sinagoga de los “İtalyanos” i la “Torre de Galata” (Galata Kulesi) son los lugares emportantes de esta rejyon.

La Sinagoga “Neve-Shalom” fue konstruizada en el anyo 1949 por los arkitektos “Bernar Motola” i

“Elyo Ventura”(z.l.) ke era el ijo del profesor de derecho (hukuk profesörü) de la Universitad de Estambol (İstanbul Üniversitesi).

Neve-Shalom es la Sinagoga la mas grandiosa (görkemli) de muestra komunitad. 

En la kaleja “Yazıcı Sokak”; aviya las dos fraguas istorikas “Kamondo Han” i “Doğan Apartıman”.

Una kaleja mas abasho “Barınyurt” el azilo de los aedados; ke era la eskola djudiya “II. Karma İlkokulu” kon el direktor “Sinyor Bicerano” (z.l.).

Un etaj mas abasho de la Sinagoga Neve-Shalom, ke se transformo agora a “Neve Şalom Kültür Merkezi” era la eskola “Musevi 1. Karma İlkokulu” kon la direktrisa “Madam Habip” (z.l.), i en “Mektep Sokak” la “Musevi Lisesi” ke akel tyempo jeneralmente  todos los djudyos estudyavan en estas eskolas.

En abashando de “Yüksekkaldırım”, a la syedra arivamos a la “Sinagoga Ashkenaz”, i mas despues “Schneidertemple” i las “Eskaleras de Kamondo”.

De la avenida (cadde) de Bankalar para abasho en Karaköy; la “Sinagoga Zülfaris”, ande antes 40 anyos se aziya las bodas. Muestras madres i padres todos se kazaron en esta sinagoga istorika.

Esta sinagoga se transformo oy al “Museo Ebraiko de Estambol”, (500. Yıl Müzesi).

Veramente una rejyon rika en todo modo punto de vista.

Viniremos a “Sarı Madam” ke era una guerta en la plasa de Galata, en el empisijo de la suvida de Kasımpaşa, en el kanton (köşe); un lugar muy frekuentado por los djudyos. Aki, los mansevos se topavan kon las ijikas i fumavan sin ke los paryentes lo sepan. Los ombres tambyen djugavan kartas i tavli en este kafe.

Ariva de la plasa puedemos ver la fragua de

“6. Daire”; la primera fragua moderna de la Munisipalidad (Belediye) de Estambol; ande se izo los planos de “PERA” ke era la perla de 150 anyos de esta sivdad.

En la kaleja de Mektep sokak teniyamos dos patiserias. Djusto en el kanton una patiseria famoza ke el patron era un grego “Sinyor Andon” ke era muy amigo de los djudyos. Enfrente, era la patiseria “Lobueno” ke el patron era el “Sinyor Bardavit” (z.l.). Esta patiseria se fue despues a Şişli, kon el nombre de “Serpil Pastanesi”.

El ijo dirijava Serpil pastanesi.

El patisyero (pastacı) Sinyor “Belifante” teniya magazen en el “Yahudi Yokuşu”. Djusto en la Kula aviya  el Sinyor “Kaneti” ke vendiya solo masapan. El famozo de Edirne lo aziya muy pastozo i savrozo.

En Doğruyol teniyamos otro şekerci Sinyor “Lici” (z.l.).

Todos eran moradores i patrones djudyos en la “KULA”. 

La avenida “Büyük Hendek” era yeno de magazenes, de zarzavatchis, bakkales, balıkchis, kasapes, turchucus, meyanecis, berberes de ombre, burekchis ke vendiyan; kyais, gözlemes i burmuelikos.

Todos eran djudyos.

El mezeci Yomtov djusto enfrente del kal Apollon era muy famozo.

El balukchi Avram vendiya a parte de los peshkados; lakerda, abudaraho, atramuzes, liparidas i chiroz.

Los chiroz eran enkolgados en lugar alto en las kuedras, para ke se seken bueno.

En Büyük Hendek aviya el Sinyor “Eliya Pardo” ke era mersiero (tuhafiyeci). Vendiya todo modo de artikolos; lanas, ilos, kroches,  kalsas, tovajas, manteles, vistimyentas para los muevos nasidos i los chikos, i a parte alkilava vistidos smokines i silendros para las bodas.

 a kontinuar...
İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın