El apartamento istoriko ‘FREJ HAN’

El apartamento istoriko ‘FREJ HAN’

“FREJ HAN” era el apartamento djigantesko (devasa), i mostrozo (gösterişli) de Şişhane. Es una ovra arkitektural (mimari yapıt), i istorika en el punto de vista ke los primeros proprietaryos tuvyeron una lejenda trajika (trajik öykü).

No se save definitivamente (kesin olarak), la data de la konstruksyon de este edifisyo animado (hareketli), mostrozo i una fragua muy diferente de lo ke se uzava en esta sivdad. Se apersiviya immediatemente kon su fronte egzajerada (abartılı cephe), i sus estatuas (heykel) en todas las partes de la fragua.

Kreygo ke este edifisyo se fraguo en los anyos 1905 – 1906.

El arkitekto de este apartamento se yamava “Kyriakidis”. No savemos nada de la vida de esta persona. Azeriya otra fragua en Estambol, u esta fragua era la primera u la de alkavo ke izo?... No se save...

Ma, se puede dizir, ke era la fragua la mas ermoza de su epoka.

El proprietaryo era de una famiya kristyana de “Beyrouth”; Selim i Hanna “FREJ”. Eran levantenes.

Eran puederosos i teniyan una situasyon ekonomika muy buena, rikoz kon grande fortuna.

Uno de los myembros de sus famiyas era “Musa Frej”; ke aviya resivido del Şah de İran las medalyas de “Leon” i del “Sol”.

Famiya emportante, fortuna, rikeza sin limito (sınırsız), la kreensa ke la vida va kontinuar ansi, los dezeos sin limitos, i a la fin provedad i trajediya.

El padre del Sinyor Selim era arabo, la madre era amerikana. El Sinyor Selim, supo eskojer su mujer de una famiya muy rika i una famiya famoza.

La famiya de madam Hanna era los reputados “GALVANİS” ke posedavan la miyatad del sentro “TEPEBAŞI” de akeya epoka.

Los raizes (kök) de los Galvanis son muy vyejos. La famiya aviya vinido a “PERA” en Estambol en medyo del 18’en syeklo. Kuando vinyeron a Estambol, merkaron en primero una villa en Tepebaşı ke era el lugar el mas eskojido (seçkin) de akel tyempo.

Despues konstruisaron un han grande en la avenida (cadde) Voyvoda, i dyeron sus nombres a este han.

Este nombre de Galvani, se troko kon tyempo entre el puevlo a Kallavi.

La famiya izo todo modo de echo de banka, komerso, i se enrikesyeron en tyempo kurto i entraron entre las famiyas rikaz i famozas de Estambol. El kazamyento del sinyor Selim kon la sinyora Hanna Frej; los enrikesyo de dia en dia. Tuvyeron dos ijos Jan i Alfred i una ija Anjel.

La vida de la sinyora Anjel parese a un filmo.

La trajediya de Anjel...

La Sinyora Anjel se engrandesyo kon sus ermanos en este edifisyo grandiozo (görkemli) de Estambol. No era fasil para eya, de ser la ija regalada de esta famiya ke posedava la fragua la mas vistoza (gösterişli) de Estambol. Un dia el direktor del muzeo de “Ayasofya” el Sinyor Feridun Dirimtekin; ke era el dirijente de una kompanyia emportante, un ombre aristokrat, muy kultivado i reushido en su vida se namoro de madam Anjel i se kazaron. Madam Anjel troko su nombre i se izo Sinyora Aysel.

Los puediyaj ver en todo modo de envitasyones diplomatikos i ofisyales (resmi) kon vistimyentas elegantes. Eya syempre kon chapeyos kon rozas, kon velos, plumas i pasharos todos elegantes.

Enfin el sinyor Feridun fue retratado (emekli).

Despues de este evenemento ampesa la trajediya.

El apartamento Frej Han se vendyo en el anyo 1948. Feridun Bey kon Aysel Hanım se van a un apartamento mas chiko en Nişantaş. De agora adelantre empesa el eskayimyento (düşüş).

El sinyor Feridun en una kayida a una foya se rompe la pacha i se muere.

Los pletos de erensya (miras) empesan. Los eredadores (mirasçılar) akuzan a la sinyora Aysel komo ke es loka.

La meten al azilo de lokos, despues al azilo de vyejos.

İ despues...

Su vida es yena de amarguras i dolores...

Arovan las antikas ke le kedo. El destino!...

İ eya se kaye a una foya, se rompe la pacha i se muere.

Madam Anjel aviya visto en su vida; las alegrias, la felisidad, (mutluluk), la rikeza, las dolores, las amarguras i la provedad todo endjuntos.

Las estatuas ke estan en las ventanas mos azen akodrar la istorya de esta fragua echa en el stil “Art Nouveau” kon los motivos vejetales (bitkisel motifler).

Malorosamente oy no ay mas moradores aya.

Va kontinuar la vida en “FREJ HAN” antes 50 anyos, ke fui i yo una de las moraderas kon mi famiya todos endjuntos, i ke pasi mi chikes.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın