El otonyo

Şeli GAON Judeo-Espanyol
6 Ekim 2010 Çarşamba

El otonyo mos traye el entuzyasmo, la egzaltasyon (coşku) de bivir; porke es la sezon de todas las fiestas emportantes; komo Rosh-Ashana; ke es el empisijo del anyo, Kipur, Sukot i Simha Tora.

Kada presipyo (başlangıç) de anyo; es muevas esperansas, muevos proyektos, muevos amigables i munchas otras kozas en todo modo punto de vista.

En los echos por egzempyo, las mezadas por los fonksyonaryos (memur), el komersa por los komersantes, la kerensya entre los myembros de la famiya i los amigos, reushitades para los elevos, el entendimyento (anlayış) entre los volontaryos de una organizasyon, la tolerensya de akseptar todos komo son, i kerer byen al den frente para pueder kontinuar las relasyones.

Ma, el otonyo malgrado esto es una sezon triste, por ke la natura empesa a trokarse, las ojas de los arvoles vedres se azen amariyas, la vedrura troka de kolor, los tyempos ampesan ayelar, las luvyas i las nuves (bulut) enserran muestros korasones.

“Chateaubriand” ke era un eskrivano fransez del 19’en sieklo; el kapo (baş) de las romantikos aviya dicho: “Keriya dar dos enveranos para un otonyo”

İ yo prefero dar tres otonyos para un enverano.

Vos kero kontar el otonyo en la isla de  Burgaz.

Los vapores se aminguaron, no ay mas motores en la mar, las kayes estan asoladas, solo los ke moran en invyerno en Burgaz estan aya, los botikaryos (esnaf) estan tristes porke los echos se aminguaron.

La kayades (sessizlik) esta reynando en Burgaz. A la fin del mez de ogusto todos empesan a tornar a Estambol. Los mansevos achikes de los ijos ke keren aparejar las kazas, la limpyeza kon las mosaz i las fam de menaj, los aedados ke se espantan ke los tyempos va yelar.

Una kayades reyna despues ke las eskolas se avren.

En el bodre de la mar, las mujeres ke tyenen entre 45-55 anyos; un grupo de mujeres se azen unas amigas entimas (samimi). Avlan endjuntos, komen i beven endjuntos, entran a la mar, i el dia pasa kon un grande entuziasmo.

Veramente kale bivir este amigable, ke kontinua i en invyerno.

La semana ultima mos fuimos kon mi marido a Neve-Shalom por fyestar Simha-Tora. En la sinagoga de Neve-Shalom aviya poka djente i porke el sentro ande se topa esta sinagoga famoza, no kedo mas djudyos ke moran aya.

Ribi Asher Levi i Albukrek mos aparejan a la alegriya de esta fiesta.

Las mujeres echando bonbones enriva de las Sefer Toras, ke los ombres estan tenyendo i baylando kon las Sefer Torot.

Los chikitikos arekojyendo los bonbones para echarlos de muevo.

Kale ver para pueder imajinar!...

En la Simha Tora se empesa a meldar el empisijo de la Tora kon la perasha “Bereşit”. Esta semana se va meldar “Noah”.

Se puede dizir ke Noah era el primer ke izo el vino. Antes de “Dionisos” ke es konosido en la kultura mitolojika, el kapo del vino.

En kada kidush ke azemos noche Shabat i en las fiestas, mos puedemos akodrar de Noah el derecho.

- Oyir syempre el silensyo mistiko del otonyo

- İ no olvidar la boz niva del enverano!...