Una ekspozisyon enteresante

La semana ultima tuve la okazyon de vijitar la ekspozisyon de “FRİDA Kahlo” kon “Diego RİVERA” en el Museo de PERA.

Frida nasyo en 1907 i muryo en 1954. Paso un aksidente de trafiko kuando teniya 18 anyos i fue ovligada de deshar sus estudyos. Se kazo kon Diego en 1929.

“Frida Kahlo” kon “Diego Rivera” fueron unos artistos emportantes del sieklo 20 en la Meksika i en el mundo entero; seyga kon sus maneras de bivir, seyga kon sus unyones, i sus karakteres diferentes en el punto de vista de mirar a la vida.

En esta ekspozisyon diferente de las otras; puedemos ver el buto de Frida en sus pinturas ke keriya kontar su vida interyor (iç dünyası); las amarguras (acı), las pasyones (tutku), i todo modo de evenementos buenos i negros ke paso en la periyoda kurta ke tuvo de bivir. Eya reusho a refletar (yansıtmak) todos sus sentimyentos.

La amor ke egzistiya entre eyos era una lejenda (efsane), un amigable ekstraordinaryo, una relasyon bazada enriva de esta amor kondensada (yoğun).

Frida diziya syempre ke no puede bivir sin Diego, i Rivera no puediya azer sin eya.

Frida Kahlo; es la mas grande pintora de la Meksika; en el punto de vista de la ondura (derinlik).

Eya mostro su personnalitad en sus pinturas; kon sus modeles de sus kaveyos, kon sus vistimyentas diferentes i kon sus djoyas kuryozas (tuhaf), i Diego era un pintor konosido i reputado.

Su ovra la mas emportante era “FRİDA”.

Eya desino su vida entera enriva de estos tres sujetos. Eya Mismo (kendisi), El Aksidente ke paso kuando teniya 18 anyos i ke la desho enfirma, i La Amor ke teniya a su marido Diego Rivera.

En el sigundo etaj aviya otra ekspozisyon nomada; “Schenas de la Rusiya de la Epoka del Tzar” (Çarlık Rusyasından Sahneler) del sieklo 19.

Esta ekspozisyon estava mostrando las pinturas realistas (gerçekçi) rusas, i la istorya de los rusos.

Las ovras fueron eskojidas del Museo del Estado Ruso en St.Petersburg.

En estas ovras; diferentes pintores refletaron diferentes espasyos de la vida Rusa de akel tyempo bazado enriva de estos sujetos:

Lavorar i la Provedad, El Mundo de la Kriyaturas, Los Divertimyentos del Puevlo (halk eğlenceleri), Las Gerras i Las Muertes, Los Novles de la Sivdad (kentsoyluları), La Rikeza de una syerta Klasa, la İndjustisya Sosyal (Sosyal Adaletsizlik), el Dedenyo por las Mujeres, i La Revolusyon (Devrim).

Aviya munchas pinturas influentes (etkili).

El tablo del “Fuego en el Kazal” (Köyde Yangın) 1870, de “Leonid Solomatkin”, estava muy empressionante. En la syedra del tablo la luna ke esta nasyendo entre las flamas de una ventana en un estado de braza (kor), el fuego, la luz, las kazas kemandosen, el puevlo ke se esta fuyendo para pueder salvarse, i en el fondo (fon) una eskalera, una bota, un kantaro, las kriyaturas yorando, las personas irremediavles (çaresiz), mirando kon los ojos yeno de espanto. 

Estos todos detalyos se estava vyendo klaramente kon las kolores i las linyas (çizgiler).

El tablo “Saludar el Soldado” (askere uğurlamak) 1880, de “İlya Repin”; me plazyo muncho.

Un kazal ruso en Moskova, un momento dolorozo, el soldado ke se va iyir a la gerra, espartyendose (vedalaşmak) de la famiya i de sus keridos.

Otro tablo muy empressionante para mi fue;

“En la Puerta de la Eskola” (Okulun Kapısında) 1897

de “N.B.Belski”. Un ijiko de ocho anyos arrasgado entero, el kalsado burakado kon un bogo en la espalda mas grande de su boy, mirando a la klasa, a los elevos ke estan eskrivyendo en sus bankos.

Se puediya ver en sus ojos; la tristeza, i la ravya kontra su destino.

Otruno enteresante; “Los Esklavos en el Bodre de Volga” (Volga Kıyısında Esirler) 1870 de “İlya Repin”. Los esklavos komo beemas travando una maona (tekne) de una manera abatidos (perişan).

En sus karas se estava vyendo; la sufriyensa en los ojos, la kanserya, la ravya (öfke), ke estavan kondanados (mahkum) a esta vida.  En el fondo la kolor de la mar rebolteada (dalgalı), los esklavos arrasgados enteros a no pueder kaminar, sin fuersa, enfasyados del pezgo ke estavan travando.

Aviya un grande kontrasto entre la rikeza i la provedad.

Aviya i ovras de “Makovski”, “Yaroshenko” i otros pintores famozos.

La Literatura Rusa; reusho a ekspozar (sergilemek) la vida embrolyada, entrifikada de akeya epoka. “Gogol”, “Turgenyev”, “Tolstoy” descrivyeron (betimlemek) todos los karakteres.

Los Eroes (kahraman) de estas pinturas son;

Los Fonksyonaryos (memur), el Puevlo Prove, las Kriyaturas, i los Kazalinos (köylüler).

Esto propozando a todos los Amorozos del Arte (sanatsever) de vijitar estas ekspozisyones, en el Museo de Pera, ke va kontinuar fina el 20 Marso.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın