A la semana ke vyene vamos a selebrar esta fyesta ke desde mi chikes la konosi komo “Beraha de Las Frutas”. Es anyos pasando ke realizi ke “Tu-Bishvat” keriya dezir 15 del mez de Shevat. Syempre esta fyesta tuvo para mi una sinyifikasyon partikolara... Era i kontinua tambien oy en diya a ser komo mesajera de las fyestas de Purim i Pesah... Es komo azer kuento: Un mez despues es Purim, otrun mez Pesah. Esta manera me aviya embezado mi kerido Nono Moshe(de b.m). Ma, oganyo komo tenemos el mez de Veadar, manka dos mezes para Purim.
Me akodro muy neto los evenimientos de los primeros anyos de la gerra, entre 1941- 44. Portanto no esto topando en mi memorya dingun rekuerdo de esta fyesta de “Tu Bishvat” de akeyos anyos. Malgrado esto, so sigura ke de una manera la fyestavamos, mizmo si teniyamos syertas estrechuras. Deke esto tan sigura?... Porke akeya perioda biviyamos en Galata, kon los djenitores de mi padre i su ermano chiko, el kerido Onkl İzak (de b.m). Seya mis avuelos, seya mi madre eran muy tradisyonalistos. No me puedo imajinar afilu, ke ivan a deshar pasar una fyesta sin selebrarla.
Solamente tengo unos imajes flus en mi memorya. Mi Nona Djoya koziya kolivas (trigo). Aki una paranteza: el byervo koliva no lo topi en el diksionaryo de Nehama, ni en el de muestra amiga Klara Perahya. Portanto esto sigura ke en mi famiya se empleava este byervo... No se si es tradisyonal o uzo de syertas komunidades djudiyas, uzavamos a kozer kolivas kuando se viya espuntar el primer dyente del bebe. Tambien se koziya kolivas en Las Frutas. Agora pensando bueno, es muy probavle ke estas kolivas ke aziya mi Nona deviyan ser i para esta fyesta. Ma, ya se muy bien ke las ke espartyo mi madre el otonyo 1945, no era por la fyesta, ma achakes del primer dyente de mi ermaniko chiko nasido en la Primavera del 1945...
1945... Anyo ke fue komo el empesijo de trokamientos en el mundo i en muestra vida. Ya lo eskrivi de modos i maneras!... En el 44 mi Onkl İzak ya aviya kazado. Se fueron a morar djuntos kon mis avuelos a sus kazas. Era a la suvida de Yüksek Kaldırım, serka el Tünel. Enfrente teniyan la guerta imensa de la Eskola Alemana. Es en esta kaza ke tengo mi primer rekuerdo neto de la fyesta “Tu-Bishvat”.
Mi Tiyo İzak no tuvo famiya. De sorte ke era muy kerensyozo kon mozotros i mis otros primikos. No eramos munchos de la vanda paternal. Mi Nono mos asentava de sira al doredor de la meza, i mos dava a kada uno i uno el fruto ke deviyamos meldar la beraha ke konveniya. Mozotros los chikos eramos tan emosyonados ke en vezes no mos saliya ni la boz en empesando a meldar:...Baruh Ata Ad. peri adama (la tyerra), peri aets (el arvole), peri agefen (vinya)...
Lo mas enteresante era el melon ke mi Onkl guadrava del enverano. En realidad no era guadrado era enkolgado kon una file en el balkon durante unos kuantos mezes!... Solo se diziya la beraha del melon i se dava una kuchiyada por la forma, porke lo de aryento ya no era mas melon! Ma, mi tiyo nunka desho este rituel ke kontinuimos anyos i anyos, afilu despues ke kazi i tuve kriatura. Entonses mis paryentes ya aviyan echo Aliya, ya aviyamos pyedrido los avuelos. Un largo tyempo no deshimos solo a mi Onkl İzak, i en su mueva morada, syempre en la mizma kalejika de la suvida del Tünel, en el Apt. Gündesh, ande eran vizinos kon el Sr. Habib Gerez... Me parese ke ya basta este moabet! Fyestas alegres...
Notisya: Espero relatar en el no: 72 de “El Amaneser” el kuento rendido de mi entrevista kon los reprezantantes de Alliance Israélite Universelle
