Fyesta de leche i miel: Shavuot

Coya DELEVİ Judeo-Espanyol
20 Mayıs 2010 Perşembe

Fyesta de Leche i Miel

En medyo de los dezyertos,

En el Monte de Sinay,

Los Dyes Komandamyentos,

Mo los arregalo Adonay...

Oy en diya, el mundo sivilizado,

Se va demandando, komo?,

Muestra profeta, Moshe Rabeno,

Antes mas de tres mil anyos,

En medyo d’un mundo primitivo,

Pudo ofreser al Djudaismo,

Estos preseptos maraviyozos.               

Un imno a la gloria de Dyo,

Ke muestro Padre arresivyo,

Fyesta de leche i miel:Shavuot,

Grande komo Pessah i Sukkot...

C. D. / 2006

Oy, 19 de Mayo, estamos fyestando Shavuot. Achakes de razones personal kedi tadre de aparejar mas antes un teksto sovre esta fyesta. En jeneral, kuando me desido de azer un artikolo sovre un diya de selebrasyon, de komemorasyon o un evento istoriko, lo eskrivo de unos kuantos diyas antes. Kalkolo ke muestro jurnal tiene lektores en las kuatro partes del mundo i lo arresiven komo 5-7 diyas despues su aparisyon... Espero ke van achetar mis razonez kon entendimiento.

Aki me esto permetyendo de transferar un teksto de muestro kolaborador de Israel, el Sr. Yehuda Hatsvi. Estas linyas ke mos aze ver otra facha del mez de Sivan, fueron publikadas en uno de los primeros numeros de “El Amaneser”. Kon estas linyas, estamos embiyando tambien muestros buenos suetos endjuntos a todos los lektores...

“El mez de Sivan se nombra por la primera vez en “Megilat Ester (8-9). Este mez fue “empesijo de bien”: en el 23 del mez de Sivan dyo el Rey Ahashverosh el firman (ferman) a Mordehai, dizyendo ke los djudios en todos los paizes de su reyno tyenen el derecho de defendersen kontra sus enemigos.“Ma, el dia mas santo i temerozo en este mez es la fyesta de Shavuot, en la kual (komo dize el piyut eskrito por Rabi Yehuda Kalayi): “En este dia abasho el D. en Sinai... a dar la Ley a su puevlo Yisrael.” Segun la lejenda, David a Meleh muryo en el dia de Shavuot. Una de las razones porke se uza meldar la Megila de Rut en dias de Shavuot, es porke David fue el desendyente de Rut la Moavita...” (fin de sitasyon)

Oy, 6 de Sivan estamos selebrando el primer diya de esta fyesta ke se yama tambien “Hag Habikurim”. Es el Diya ke Moshe Rabenu resivyo la Tora en el Monte de Sinay. A la okazyon de este diya, vos kero prezentar estos versos ke ize antes unos kuantos anyos. Hag Sameah Shavuot.