Ahare Yom Kipur

Rav Yeuda ADONİ Köşe Yazısı
15 Eylül 2010 Çarşamba

En la peraşa ‘Ahare’ nos enbeza el sirvisyo. Ke aziya el Koen Gadol en el santuvaryo en el diya de las perdonansas Yom Kipur. Arambam la mişna la eksplika dizyendo: Kuando el Koen Gadol tornava a su kaza despues  ke kumplyo su sirvisyo, la akonpanyavan asta su kaza, i aziya un banketo a sus keridos porke tornava a su kaza sana i rezyo.

El banketo ke aziya el Koen Gadol era por ke no se danyo en el santuvaryo la ora ke el izo su sirvisyo. Un Koen ke no era pertenesyente por azer el sirvisyo de el diya de la perdonansa, no puediya salir bivo de el santuvaryo. I por esta razon es ke el Koen Gadol no deviya alargar su orasyon, por no azerlos dezesperar a el puevlo.

El banketo ke aziya el Koen Gadol en su kaza, le enteresava a su persona el Koen Gadol deviya ser kazado i orasyonar por su famiya i no solo por si. Antes de el diya de los perdonansas se deviya apartarse de kaza i santefikarse. Kuando ya izo su sirvisyo ke yo fue resivido de parte de el todo podorezo, tornova kon alegriya a su koza, onde su famiya.

El sirvisyo ke aziya el Koen Gadol en diya de Kipur era por santefikar a el mundo el este tomar la santedad de los alturas i abasharlo a el mundo ande bivimos mosotros. Ansi en tornanda el Koen Gadol a su kaza trayiya kon si la santedad a su kaza i a el mundo.

Semejante a este sujeto lo rankontramos en Rabi Akiva ke es diço por el, entro kon pas i salyo en pas. Rabi Akiva estudyo todos los sekretos de la Tora. Este estudyo no lo izo solamente para si solo sino, por enbezarlo a el mundo entero.

El eskopo de la kreasyon de el mundo es de azerle una morada a el Kriyador en este mundo por traer la santedad de las arturas a el mundo el este.

En el livro “Tana deve Eliyau” meldamos: ansi dize el Kriyador a Israel, yo kualo dezeo de vozotros? De amarvos unas kon otros. Komo el Kriyador se apiada kon todas las Kriyansas, i nosotros devemos de apiadar mos de unos a los otros, seya moralmente seya materyelmente. Kada persona es presyozo verso el Kriyador, por ke es tu Kriyansa, i nosotros devemos apresyar a toda persona por ke todas somos Kriyansas de el todo poderozo. Malgrado todos nos defektos el Kriyador syempre esta entre nosotros.

Aşohen itam letoh tumotam.

 

La perasha de la semana pasada

Aazinu

 

En los oltimos diyas de Moşe Rabenu, le dize el kriyador a Moşe Rabenu ke yame a Yeoşua, i ke se paren los dos enel Mişkan (Templo) ke kere akavidarlo i rekomendarlo al puevlo delantre Moşe porke se apronte a ser rizidor del puevlo, despues de azer ansi Moşe Rabenu, le enkomendo el kriyador ke eskriva una ŞİRA (Poeziya-Kantiga) i ke se las enbeze a ‹srael antes de su muerte, porke le seya de una testimunyansa.

Moşe Rabenu se va a la manyana i rekonta todo esto al puevlo de ‹srael dizyendoles ke el ya arivo a la edad de 120 anyos, ke el mas no puede ser ke vaya i venga kon eyos.

En akel diya mismo eskrivyo Moşe Rabenu el livro santo el Sefer Tora del presiyo fin al Kavo. Lo entre go a las leviyim i les enkomendo ke lo metyeran en el Aron Akodeş al lado de las tavlas de la ley. İ meldo delantre todo el puevlo la ?ira ke eskrivyo perat-Aazinu i se las dyo a entender byen sigun le enkomendo el todo poderozo.

Esta Şira, es una coya muy valutoza i un trezoro muy estimado en la literatura Cudiya.

El resumido de esta Şira es: Ke Moşe Rabenu tomando por testiguos a las syelas i a la tyera, deklaro al puevlo Cudyo ke, todo tyempo ke eyos avedesen a los komandos de la ley syempre vana tener munço bueno, i prosperaran en todas sus ovras. Al kontraryo, si no afirmaran la ley pueden kayer a un estado muy desagradavle.

En esta Şira, figura Moşe Rabenu todo lo ke tyene ke pasar el puevlo Cudyo disde akel tyempo asta los oltimos diyas. El dize klaramente ke primeros diyas ke vana entrar a la tyera de Kenaan, vana bivir kon pas i alegriya i vana gozar de lo bueno de le tyera. Me despues syendo vana estar artos de munço bueno, vana reveyar i olvidor al dyo ke los truso a esta pozisyon. El kriyador ensanyandose sovre eyos no tyene ke azer nada mas ke retirar su mamparo de sovre eyos. İ deşarlos kayer en mano de sus enimigos.

Moşe Rabenu promete ke a los kavos vyendosen los Cudyos en grande apreto, entyenderan ke eyos mismos fueron los kavzantes de sus angustyas i tornaran de sus negras kominos, el kriyador se apiadara otra vez de eyos, se vengara de sus enimigos. ‹ les dara ropozo i un buen avenir a los Cudyos. Syendo todo es su poder. El es el ke melizina a todos.

Esta ?ira (poesiya) ?irat Aazinu tyene la enportansa por el sostenimyento de la relijyon.