Alüminyum Hurda Geri Dönüşüm

Otrun poko de moabet

Otrun poko de moabet

Estamos presipyo de Agosto... Ay una kalor muy fuerte ke no esta dando ni gana   de salir a la kaye. Tomi El Amaneser del otro mez i esto aboltando las ojas por kontrolar si kedo algun teksto ke no meldi. Ansi, me topi otruna vez delantre la eskrita de Daisy Alalouf-Newell. Este teksto ya lo aviya meldado antes muncho tyempo en L.K. Ma otruna vez lo meldi kon plazer. Apenas lo eskapi, me dishe de mi para mi: “porke no azer un poko moabet de aki de aya, olvidar un poko la kalor i los sujetos seryozos ke eskrivi estas semanas d’alkavo”... i me akodri...

Antes unos kuantos anyos, eskrivi sovre las mujeres i muchachas Djudias, sus saveduria... Me aviya bazado djustamente sovre los rekuerdos de Daisy Alalouf-Newell. Me akodro, en mi chikez kuando se pruntava a una ninya kualo se va azer en engrandesyendo, eya respondiya: “Yo me vo azer novya!..” No esto muy sigura si estas chikas se ambezaron las konsejas, kantikas o tomaron los konsejos komo mensyono Daisy. Ma, gizar, rijir una kaza, kuzir a lo menos un boton kayido o un lugar deskuzido... Esto i un poko mas, naturalmente ya mo lo ambezaron muestras madres, aun ke estavamos estudyando.

En mi chikez, ya sintiya de mi Nona, o de mi madre romansas en J-Espanyol. No ize esforsos para ambezarmelas (ke manziya !). Portanto, oy dayinda me akodro estos ritmos, i mizmo los byervos ke kedaron en un kantoniko de mi memorya... Djusto komo kedaron los rekuerdos. Al pareser, en muestra prima manseves, no mos enteresimos muncho a estas romansas Sefaradis... Deke?... Estavamos muy okupadas! kon los filmos, kantikas Amerikanas o Fransezas de akeya epoka!...

Vinyendo a las muchachas de oy. Eyas no keren ser solo novyas, ma, mujeres ke tyenen kriaturas i karyera tambyen. En vezes, este dezeo se esta prezentando komo un dilemno:(ikilem) “Karyera o kriatura?” El shifro de las mujeres ke lavoran por diversas razones, esta pujando de diya en diya. Los maridos se estan aserkando kon mas entendimyento (anlayış).

No se puede komparar el estado jeneral aktual, kon el de antes 60-70 anyos. Oy, un grande shifro de ijas estan azyendo altos estudyos. Lojikamente, no se aspera de eyas, ke se asenten en kaza brodando! o gizando en el mupak! diya entero. Es muy normal ke van a kerer tomar el fruto de tantos anyos de estudyos. Unas dezean lavorar, porke esto les asigura una independensya (özgürlük) sosyal i ekonomik. Otras, son “ovligadas” de lavorar por menester materyal.

Kualas ke seyan las razones, el reel problema ampesa kon el bebe, espesyalmente en las unyones kon estrechos remedyos monetaryos (dar gelirli). Pueden tener la shans de posedar sus madres ke les ayudan para kudyar al bebe. En todo kavzo, la “parida” no tyene el lukso de deshar su lavoro un largo tyempo, i tomar el riziko de no topar echo  despues.

Las ke lavoran antes de kazar, i tyenen una buena pozisyon, ke pueden ser sus alternativas? (seçenek). Konosi bastante este djenero de kavzos. Unas, al koste de atrazar la felisidad de ser madre, dyeron la prioridad (öncelik) a sus karyera. Asigun eyas, las kriaturas tyenen menester de sus madres “Full Time” i no “Part Time”! Ma, siguro todas no pensan ansi. En la mizma pozisyon, ay las ke kontinuan a lavorar, tenyendo la posivilidad de pagarsen una profesyonal para el bebe (dada).

De ande, ande vine!... En rezume, yo digo ke no se puede jeneralizar. Lavorar es el dirito de la mujer. De otra parte, ser madre es una eksperyensa sin igual. Esto  sigura ke se arranja de una manera o otra, para gozar de la ermozura de ver engrandeser su kriatura...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın