Alüminyum Hurda Geri Dönüşüm

Moabet de 14 Febrero

Moabet de 14 Febrero

El 14 Febrero konosido tal “La St.Valentine” mizmo si es una selebrasyon importada, es una okazyon, una oportunidad de ermozear la vida. İ, D. save si tenemos menester d’un poko de pozitivo en estos diyas “enuvlados”. Un ayre de romantizmo no aze danyo a dingunos. Ya es verdad... ma kualo puedo eskrivir de muevo, ke no eskrivi asta oy?..  Djusto aki me akodri del elojyo ke en una letra me izo el Sr. Avram Behar de Yerushalayim... Dizyendo ke yo tengo un manadero sin kavo, komo un pozo sin fondo, siguro ke estas linyas me aviyan echo muncho plazer kuando las aviya meldado...

Ma, kreevos keridos amigos, no es syempre ansi. Ay vezes komo oy, ke kedo un buen momento enfrente la komputadera... Sin pizar ni una letra d’el klavye. Deven ser los momentos ande tengo la impresyon de ver el “dip del pozo”! Orozamente ke es pasajera... Bueno, ampesaremos kon una pregunta:  “Para amostrar vuestro amor, es ke ay menester d’un apoyo konkreto ke daran mas fuersa a vuestras palavras?” Kuando meldi esto antes un syerto tyempo, me kedi enkantada.

El autor del artikolo estava insistiendo sovre el fakto ke no abasta de dizir “Te amo”, se deve prevarlo!! İ ke manera? Kon un regalo, kon flores i tambien una komida romantika ets.. En prinsipio no puedo konsever la idea de “insufizensya”en diziendo solamente te amo. Si la persona lo dize kon sinseridad, del korason, esto sigura ke ya estan todos sus sentimientos en los byervos i... en sus ojos tambien. Al pareser ke la vanda poeta miya me aze pensar ansi komo una romantika inkuravle! Ma, la vanda pratika miya no dize “no” a las flores, a un regalo i mas ke todo, no refuza un dine “tete a tete”  akompanyado kon una dulse muzika. Esto amostra ke i la vanda pratika miya es un poko romantika! No ay remedyo a esto!!

No se si se puede dar una definisyon del “Amor”. Muy frekuente se demanda: “Kualo es el Amor?” Tengo o no mi idea, ma no es valivle porke, dizen ke el Amor tiene inombravles definisyones i tambien diversas fachas. Esto, muy frekuente lo enkontramos en las kantikas. “Los Paraguayos” en una melodia dizen ke: “el Amor obsesyona el ombre por una mujer”.. D’akordo, ya es egzakto ke syertos amores se transforman en obsesion, no solo del ombre, i de la mujer tambien.

Kontinuando kon los kantes, veremos kualo disho Julio İglesias: “El Amor, no solo son palavras ke se dizen por un momento, sin pensar... Son estas otras kozas ke se sienten sin avlar, al sonreir, al abrasar...” Ke ermozas frazas.. Malorozamente ay munchos septikos ke afirman ke no egziste el Amor... Ke es una grande mentira, traisyon, lagrimas i arrepentimientos. Al lugar de komentar, prefero sitar los byervos del poeta fransez, Louis Aragon: “No ay Amor feliche. Si kada amor era orozo, deke se eskrivyo tantos romansos de amor ke los mansevos meldaron kon lagrimas en los ojos?..”

No se kualo ke diga sovre estas palavras. Ay amores orozos, ay otros ke no lo son. Esto es la vida. Portanto ay un punto ke devo konvenir: El Amor no  konose ni reglas ni obstakolos. No se puede definir de manera kategorika lo ke, asigun los romantikos lo aze “majiko”. Unos dizen, es la sorpreza ke mos apareja la suerte, otros afirman ke es el mas presyozo regalo ke mos aze la vida. Keridos amigos, puedesh eskojer la definisyon ke vos plaze. No vos olvidesh ke el Amor es un largo kamino. No tiene edad, frontieras ni distansyas. No se save ande va apareser ni kuando lo vas a konoser. 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın