Las esperansas del anyo 2010

Las esperansas del anyo 2010

Un anyo muevo es un presipyo (başlangıç); ke kontyene todo modo de evenementos, mos da la kuryozitad, la emosyon i la pozitivitad de ser realistos.

Un anyo muevo kere dizir para mi; muevas esperansas, muevas vidas, muevos empisijos.

Ande ay la vida, aya ay la esperansa. Kada anyo muevo es el mesajero (haberci) de las kerensyas ke pujan.

Yo penso ke todo modo de negreguras i de maldades van a tener fin kon el anyo muevo i las buendades van a kuvrir el mundo entero.

Kale pensar bueno, para ke todo se aga bueno, mizmo ke ay munchas difikultades i puntos negativos en la vida. Mi nona (ke este en ganeden) diziya;

“En Kada Kaza

Una Braza”.  Ya es verdad. Kada uno i uno de mozotros tyene problemas diferentes kon su famiya, kon los echos, kon la sanedad i munchos otros kavzos.

Lo emportante es de ser sanos i rezyos para pueder luchar kon todas las difikultades. La vida es una lucha (mücadele) ke kontinua fina la muerte.

Kale ser pozitivos i no dar grande emportansa a las kozas chikas.

 Esto ogurando ke el anyo 2010 mos trayga;  la sanedad, la felisitad a muestro pais i al mundo entero, el kalmo, la unyon i la solidaritad.

Dostluk Yurdu Derneği; es una asosyasyon ke arekoje los mansevos i mansevas djudyos, i aze ovras i aktivitades kulturales komo teatros, paseos, partis para adjuntar los djovenes en entegrandolos a estas aktivitades.  Esta asosyasyon es muy konosida, sovre todo en el espasyo del teatro.

Kada anyo djugan una pyesa de teatro diferente, kon personas de edades diferentes.

Oy tuve la okazyon de asistir a una pyesa de las mujeres volontaryas del Dostluk. El nombre de la pyesa:

“La Vida Esta Kontinuando”, (Hayat Devam Ediyor); kon tredje artistos djugando tanto bueno, ke se puede dizir ke son komo profesyonales.

Eyos tomaron komo sujeto, diferentes famiyas, las relasyones entre madres i ijas, padres i ijas, inyetas, maridos i mujeres, bivdas, mosas ke son komo patronas de kazas, amigas: djusto la vida de oy.

Natan Siliki en el rolo de un ombre bivdo ke no se kere iyir ande sus ijas i kere bivir en su kaza solo, Suzi Eskenazi en el rolo de ayudante ke alimpya i arekoje la kaza, la manera de avlar i djugar djusto komo una mosa, Forti Barokas una mujer sola ke kamina dia entero kon sus amigas i no desha bivir a su ija, syempre keshandose de la soledad, Soli Avigdor kon Erol Eskinazi; marido i mujer ke se estan peleyando siempre, porke el marido retratado (emekli), esta en kaza i se esta mesklando de todo, i Anjel Meşulam mujer ke la desho su marido, hazina de limpieza i ke no tiene tyempo de mirarse a si, ke djugo maraviyozo ke djugatej!...

Munchas felisitasyones a todos los artistos i artistas, mansevos i mas aedados, vuestro talento (yetenek) estava koza de ver!....

La fuersa del djugo (oyun gücü), la dominasyon de la shena (sahne hakimiyeti), el dekor, los kostumes, todo estava mas ke bueno.

Entremientes kero felisitar al direktor (yönetmen) mansevo de esta pyesa “Ferit KOEN”, ke kon su lavoro de alma i korason,  i kon su ardor parvino a una demonstrasyon ke no se puede eksprimir kon palavras.

Felisitasyones a todos los dirijentes del DOSTLUK; de tener la veluntad de krear estos projektos kon muncha ardor.

La amistad ke tenej de anyos largos fina oy entre  vozotros, ke puje de dia en dia, i ke no se eskape nunka, para motivar i adelantar vuestra organizasyon, kon munchas reushitades!...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın