Estamos bivyendo el mez de Septembre. Ultimos diyas de Enverano. Poko a poko vamos a ver demanyanadas, tadradas mas freskas, mas eskuras i puede ser sielo enuvlado, luvyas... La sivdad va empesar a arrebivirse kon toda la prisa (ajitasyon) ke konosemos kada trokamyento de sezon. Las eskolas se avren, el trafiko se intensifika ets.. En kurto, es el empesijo del Otonyo. Naturalmente munchos pensan ke ya es la fin del enverano, de los diyas kayentes i klaros. No se deke, a estas personas no les gusta tanto esta sezon. Egzajeran afilu, asta pretender ke Otonyo es sinonimo de melankoliya, por no dizir de tristeza!. La verdad yo no puedo konsevir esta idea.
Adjustare ke oganyo estamos bivyendo una koensidensya, kon el Ramadan ke estan kumpliendo muestros amigos i vizinos Muzulmanos. La fyesta ke yamamos tambien “Şeker Bayramı” va empesar el sigundo diya de Rosh Hashana... Bueno, el mez de Septembre no es solo el mesajero del Otonyo kon sus luvyas, kon sus ayres. Komo lo dishe mas arriva, por siguro ke va aver diyas ermozos, kalmos, kayentes i un sielo klaro. Ma, lo mas importante, Septembre oganyo renferma una partida de Elul i Tishri, ke es el mez de fyestas, de selebrasyones. Es el empesijo de una mueva anyada.
El mez de Elul, entre otras, tyene la partikolaridad de ser el ultimo mez del Kalendaryo Ebraiko. İ este mez mos aze sintir ke, semana por semana, diya por diya se estan aserkando los “Diyas Temerozos”. Diyas nombrados “Yamim Noraim” i konsiderados komo una peryoda de djuzgamyento, de arrepentimiento o de regretos. Tambien Elul es dicho ser mez de oportunidad i konosido komo mez de piadad: “Hodesh Harahamim”. En muestra Historia los diyas entre el primo de Elul i el 10 de Tishri fueron una peryoda espesyal de egzamen de konsensya i de perdonansa.
Durante el mez de Elul, el Shofar de las orasyones de demanyana moz aze akodrar ke Rosh Hashana i Yom Kippur estan aserkando. Akodrar, rememorar... Komo lo savemos, uno de los prinsipales donos del Judaismo es akodrarse, es la memorya. El byervo “Zahor” es la yave de de munchas mitzvot, de munchas valores tradisyonal ke poseda el Puevlo Djudio. Es tambien la baza del diya Santo de Shabbat ke, en los 10 Komendamyentos empesa kon el byervo Zahor ansi: “Akodrate de sanktifikar el Diya de Shabbat”... Akodrarmos... Las golores de un mupak (kuzina) un diya de vyernez, mos azen akodrar ke Shabbat es reel, inolvidavle... Asentados debasho la “Suka”o sintyendo el Shofar o komyendo Matsa en el Seder de Pesah... Estos son los elementos ke forman la memorya del Djudio.
En metyendo el punto final a este teksto de muevo anyo, aki kero transferar un paragrafo del artikolo miyo ke eskrivi en 2006 a la okazyon de Rosh Hashana: Una de las Mitzvot ke la Tora mos preskrivyo por el Diya de Rosh Hashana, es de sintir el Shofar. A kada vez ke sintimos esta boz dizimos: “Ayom Harat Olam”... Oy mozotros selebramos el evenimiento ekstraordinaryo de la kreasyon del Universo... Sueto ke la mueva anyada 5770 seya manadera de favores divinas. De paz i repozo para el mundo entero, Amen. Shana Tova- Hag Sameah- Tizku Lashanim Rabot.
