Alüminyum Hurda Geri Dönüşüm

Muestras valores tradisyonalas -2

Muestras valores tradisyonalas -2

En mi primer artikolo sovre este sujeto, avlimos del Taanit en jeneral. Espesyalmente de los ke azemos en komemorasyon de las desgrasyas del Puevlo Djudio en el korso de la Historia. Avlimos de “Shiva Asar Be Tamuz” i de “Tisha Be Av”. En serrando el kapitolo sovre el “Ayuno”, va adjustar unas, dos palavras, syendo ke estamos avlando de tradisyones. Aki puedemos avlar de los ayunos “individual” (kişisel). Kero dizir la persona aze un “Neder”, o por otras razones personal ets... Esto lo bivimos todos. Finalmente kero adjustar ke el eskopo del Taanit no es simplemente afriirse (kendini mahrum etmek) de komer. Es pensar, meditar (düşünmek) sovre las razones del Ayuno i akodrar los eventos.

Si no me yerro, ay komo una konviksyon unanima (genel bir kanı) ke el mez de Av es un mez de destruksyon i de luto. Efektivamente, las tres semanas entre el 17 Tamuz i el 9 de Av son konsideradas komo una perioda de desgrasyas i de dolyo. El Primer Templo fue destruido por los Babilonianos, i el Sigundo Templo por los Romanos en la mizma data: el 9 de Av. İ puedemos dizir tambien, kon una trajika koensidensya (rastlantı), en el “Dekreto d’Ekspulsyon” de 1492, la data final del termo (süre) akordado a los djudios, era el 9 de Av, un Tisha Be Av.

Portanto, Av no es solamente un mez de dolyo. En el artikolo “The Meaning of Tu Be Av”(la sinyifikasyon de Tu Be Av) meldi esta fraza bastante enteresante: “..Sej akontesimientos pozitivos se realizaron en el 15 de Av, azyendolo diya de festividades en el Kalendaryo Djudio. “Despues de aver meldado esto, por kuryozidad bushki i otras fuentes manaderas sovre el 15 de Av. Lo ke meldi en mayoriya es de karakter tradisyonal relijyozo i siguro ay i trasas de tradisyones folklorikas.

Por egzempyo, Rabbi Shimon Gamliel, en su Mishna dize: “No uvo otros diyas tan buenos para Israel, komo el 15 de Av i “Yom Hakipurim” en los kualos las jovenas de Yerushalayim saliyan vestidas de blanko..”

Bueno, en kualo Tu Be Av es ekivalente (eşdeğer) de “Yom Kippur” ke simboliza la Nasyon Djudia pardonada por el pekado de aver adorado el Bezerro (buzağı) de Oro? Kippur es el Diya en el kual, el Todo Poderozo acheto los argumentos de Moshe Rabenu por el pardon de su Puevlo. Muestros savyos dizen: “No ay mas grande kontentes ke de ser pedronados por los pekados. En Yom Kippur por el pekado del Bezerro de oro, i en Tu Be Av por el pekado de los eskuldadores ke fueron investigar la Tyerra de Kenaan.”(este pasaje es relatado en la Perasha “Shelah”)             

Desde los tyempos Biblikos el 15 de Av fue selebrado komo fyesta de amor i de kerensya. En el Kalendaryo Djudio, Tu Be Av tradisyonalmente marka la fin del enverano. Es tambien la fin de las fyestas djudias del anyo. Syendo el 15 del mez, es noche de lunar, komo uzamos a dizir “ La Luna en kinze”. Una semana antes, el 9 de Av (Tisha Be Av) mos aze akodrar muestra Historia trajika. Dizen ke la Luna en kinze de Av simboliza la transformasyon del dolyo en alegriya.

Kon esto, terminaremos muestro moabet kon las palavras del Sr. Yehuda Hatsvi: “..en tyempo del Bet A Mikdash el sigundo, el diya de 15 de Av era una fyesta popular. Las ijas de Yisrael saliyan a baylar en las vinyas, vestidas todas de blanko. Naturalmente munchos despozoryos se fiksavan en akel diya, komo el “rezultado” de los ermozos bayles...”  

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın