Sujeto favorito muestro, los de una syerta edad (por no dizir aedados!!). Bozes de muestra manseves no las estamos mas oyendo entre las kalejas... Pokos lugares del pasado egzisten oy, no los estamos vyendo entonses. Otros trokaron de facha o konsepto. Este artikolo no se komo rijirlo, kaminando i avlando!. Syen por syen ke va ser otruna ola de rekuerdos i nostaljiya. Empesando del Tunel, enfrente la salida, en los anyos 50, aviya un borekchi, lugar preferido de mi padre i mis ermanikos. Ke se izo, no se. Me akodro tambien de “Mandra”, ande merkavamos kezos, kaymak ets.. freskos i delisyozos. Agora en su lugar ay un “café”.
Kontinuando verso “Beyoğlu” (Pera), dos grandes patiseriyas famozas “Lebon” i “Markiz”. Kuryozo, syempre tuve la impresyon ke teniyan un destino komun, komo buchukes, una enfrente de la otra. Konosimos Lebon en la kyoshe syedra de la abashada “Kumbaradji”. No se deke no tuve okazyonez de frekuentarla en mi chikez. No uzavan mis paryentes, probavlemente.
Morando en Galata, el paseo favorito de la famiya era Pera. Syempre ke pasavamos por Markiz, yo me aretava para admirar la vitrina, las damas elegantes todas kon chapeos. Kon mi imajinasyon de kriatura, me paresiya un “paradizo chokolata”, defendido para mi!!. Puede ser por la mizma razon ke “Lebon”... El diya de mis 12 anyos, mi papa kijo yevarme al sinema i merkarme el regalo de aniversaryo. Delantre de Markiz, remarkando ke sospiri, me propozo de entrar a la patiseriya al lugar de ir al sinema. Fue un rekuerdo inolvidavle, el empesijo de una mueva “abitud”. Anyos pasando, es ayi ke enkontri al mansevo ke iva devenir mi espozo. Markiz fue muestro preferido asta su serradura en 1980.
El “Passage Markiz” aktual, (Şark Aynalı Çarşı un tyempo) lo konosimos komo “Passage Oriental”. Dizen ke, syendo defendido entrar a Markiz sin chapeo, el “chapelyero” del pasaj abastesiya chapeos a las damas! Me akodro, del famozo samarrero Lukresi, ande me merki un chapeo de samarra. Naturalmente, no era para entrar a Markiz!!...
Medyo del 19. Siglo, Edouard Lebon avyo la “Patisserie Lebon” en el lugar ke se topa oy Markiz. Troko de mano en 1940 i paso enfrente, ande syempre la konosimos. Aktualmente se enchikesyo i esta kontinuando en la kyoshe derecha de “Kumbaracı” komo “Lebon-Burç Café”.
En el lugar ke desho Lebon, el mizmo anyo avyo Markiz kon espesyalitas de Paris, kon sus kristales i porselana Christofle... I naturalmente kon la chokolata “Marquise de Sévigné” ke le dyo su nombre. Devo adjustar un detalyo importante. Los maraviyozos panos de fayans evokando las sezones, eran erensya! del tyempo de Lebon. El “Printemps” fue syempre mi preferido. Despues de aver kedado silensyozo 20 anyos, Markiz se avyo en los presipyos de 2000. Un poko kuryozos, un poko emosyonados mos fuimos tomar un kafe kuando estavamos por Tunel. Ma no pudimos apanyar la ansyana “majiya”.
En direksyon de Taksim, pasando Galatasaray, a la syedra, “Baylan” ke preferavamos. Era una patiseriya konfortavle kon mezas i siyas, i siguro kon presyos mas abordavles ke Markiz. Teniya una sukursala en Karaköy ande uzavamos ir salyendo del vapor. Se serraron, ma sinti ke esta kontinuando en la kosta Asiatika. Syempre verso Taksim, la patiseriya “İnci” famoza kon su profiterol. Oy en diya egziste kon su eslogano “la savor vyeja no se peryo, esta dayinda aki!.” No me esto akodrando egzaktamente kuando se avyo. Me parese ke fue empesijo de los 50.
Profitando ke estamos en Beyoğlu, ke dizish de entrar a “Hacı Bekir”? Es una firma klasika, muy ansyana konosida en el mundo kon su “lokum” tal ke “Turkish Delight”. Oy, esta kontinuando en diferentes sentros de Estambol, kon diversos pastos, kon su lokum i akide. Me parese ke basta esta toda dulsurya por oy. Al toparmos en otro moabet...
(a kontinuar)
