El Otonyo de detras de las Fyestas ke Pasaron

El Otonyo de detras de las Fyestas ke Pasaron

El otonyo (sonbahar)  es una sezon ke traye la felisidad i el entuzyasmo (coşku)  de bivir.

Mizmo ke los dias se ampesan a akurtar, i las noches a alargar; el otonyo es el empisijo de una anyada mueva, para mozotros los djudyos del mundo entero, porke; Rosh-Ashana, Kipur i Sukot; estas tres fyestas emportantes se selebran en esta sezon.

Komo mi marido Meir GAON; es el gabay de la sinagoga de Burgaz; mozotros fyestamos siempre Rosh-Ashana i Kipur en la isla. En Rosh-Ashana aviya sesenta mujeres kon kuarenta ombres en el kal.

Meir Gaon; remersyo las mujeres de sus partisipasyones i disho ke; en la ley djudiya las mujeres tienen una emportansa partikolar. Porke eyas ensenyan (öğretmek) la relijion a sus ijas i ijos, i les ambezan muestras tradisyones (gelenek). Eyas  son el kapo (lider)  de la famiya en este sujeto. 

Las orasyones en Kipur teniyan otra savor, porke  kon todos los yahides somos komo una famiya en Burgaz. En Kipur mos eskuzamos  del “Dyo”; del todo el Puederozo, de los yerros  ke izimos en el enterval del anyo.  El Selihot ke se aze en todas las sinagogas, es; demandar pardon de las kulpas ke egzekutimos en el anyo entero.

Entre semana se aze tres orasyones, en el dia de Shabat se aze kuatro i en Kipur se aze sinko orasyones.

Es la Orasyon de “NEİLA.”

En la ora de la orasyon de Neila; el Dyo estampiya (mühürlemek) muestros  pekados ke pardono.

Komo los tiempos ya yelo, los pasharos ya se fueron, la kolor de  las yervas ya se  ampesaron a trokarsen  de vedre a amariyo i maron, todos ya desharon las izlas para iyirsen a la sivdad. Por esta kavza,  Sukot lo fyestimos en la sivdad, en la Suka de Barınyurt kon los pansioneres endjuntos.

Shabat la noche; mos fuimos a la sinagoga famoza

Neve-Shalom por Simha Tora. Kada anyo tenemos esta uzansa de iyir aya para fyestar kon los turistos, las kriyaturas i myembros de muestra komunitad, todos endjuntos esta fyesta kon ardor i amor. Echamos bonbones kuando pasan las Sefer-Toras, kantamos, mos emosyonamos i oguramos; sanedad, reushitad, ermozuras de muestras famiyas, i parnasa para todos, unos kon los otros.

Es una alegriya i un dover de asistir a estas seremoniyas para pueder kontinuar muestro djudaismo.

Ma, el emportante es de tomar i plazer en partisipando.

Pueder topar la felisidad (mutluluk), kon chikos plazeres en la vida, es una kalitad espesyal, i depende del karakter de la persona.

Kada Rosh-Ashana, anyada mueva, traye kon eya; muevas esperansas, muevas deskuvyertas (buluş), i muevas reushitades en todo modo de espasyo.

Kada anyo muevo es un presipyo (başlangıç), ke kontyene la emosyon, la pozitividad i la estabilidad (istikrar) entre los paises. 

En el empisijo del anyo muevo, tomaremos desizyones komo;  kerer Bien al den frente mas muncho sin ver sus yerros, dar Amor al entorno i okupar de los ke tienen menester de muestro Apoyo (destek).

Teneremos solidaridad (dayanışma) entre mozotros, mos adjuntaremos (birleşmek) en muestras ideas, i ke nunka; la LUZ  de la ESPERANSA no manke de muestra VİDA.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın