La filozofia de la vida

Şeli GAON Judeo-Espanyol
1 Temmuz 2009 Çarşamba

Ayer dainda teniya vente anyos, estava djugando kon la vida...  Me estava paresyendo ke tengo muncho tiempo. No saviya ke la vida; se estava aresvalando muy presto. Ayer apenas teniya trenta anyos; gasti (harcamak) el tyempo por los ijos, marido i mi echo, los dias pasaron sin profitar un poko. Esto era komo una kompetisyon (yarış) kontra el tiempo.

Ayer dainda teniya kuarenta anyos, no tuve tiempo de ver engrandeser a los ijos, kada dia echo i apretos de korasones, (sıkıntılar), estava bushkando un poko de tiempo para repozarme. Ma; los echos de kaza, los empleos, las responsabilitas... El tiempo ke esta pasando muy presto ande mos esta yevando? Ayer apenas teniya sinkuenta anyos, Los ijos se espartyeron de mozotros para fondar sus vidas propyas. Agora para bivir komo kero, para valorizar el tiempo ke me dyeron komo regalo, kije un poko azer todo avagar avagar... Ma; komo kada dia; el lavoro, los echos de kaza i de afuera, todo agora me esta kansando mas presto...

Oy tengo sesenta anyos, agora me esto kansando muy presto, esto apartando tiempo para pueder sintir la admirasyon (hayranlık)  ke tengo por la vida,mizmo si esto lavorando, esto apartando tiempo. Esto topando el tiempo para azer lo ke me plaze. Me esto konsintyendo ke este momento ke esto bivyendo es muy presyozo. Porke dingunos; no savemos lo ke va afitar amanyana.... Estamos konversando (sohbet etmek) kon mi marido; lo ke no puidimos azer en lo pasado. Estamos avlando sin mirar de detras. Kuando estamos mirando el tiempo esta muy ermozo. Mizmo ke mos estamos envyejesyendo; la vida esta muy ermoza. De agora adelantre esto ovligada de bivir el tiempo ke me kedo.Alora; sin ke se eskape el tiempo, kale ke troke mi mirada a las kozas (bakış açısı)... İ akeyo es mi vida... Ayer teniya vente anyos, ma, agora; ya se lo ke es el tiempo!....

A los dias los mas ermozos...