“El mundo apartiene a los ke se alevantan tadre!” No pensesh keridos amigos, ke ize un yerro o una shaka. Antes de dar eksplikasyones, veremos otruna vez:
Todos konosemos esta dicha turka ke dize: “Erken kalkan çok yol alır”. (el ke se alevanta presto toma muncho kamino). Este modo lo supimos, syempre i lo pratikimos. Ma meldi sovre esto un artikolo ke me enkanto un poko. Esta komo dizir?... en kontradiksyon kon la dicha. Antes de relatar lo ke meldi, avlaremos de la jeneralidad: kualo es el esfuenyo? (durmir)
Durmir kon entervalos arreglados, ayuda a la konservasyon de la salud. Normalmente, un adulto nesesita un esfuenyo entre 6-9 oras al diya. Por siguro, la edad influensa el menester de durmir. De sorte ke un muevo nasido durme a chikos entervalos, kaji 16 oras al diya. En una kriatura de 2 anyos esto puede abashar a 12 oras. Estamos konstatando i en los aedados (o en syertos!) este ritmo partikolar, el ritmo de los bebes. Siguro no en todos los aedados, no kero jeneralizar. Unos azen durante el diya chikas pauzas de durmir un poko, lo ke en turko yamamos “kestirmek”. İ, la noche durmen solamente unas kuantas oras.
Komo lo savemos, la esveles (uykusuzluk) kronik puede deranjar las aktividades del meoyo i del sistema nyervozo (sinir sistemi). Par konsekuensa, el esfuenyo djuga un rolo pozitivo sovre el organismo. Agora kero relatar a lo menos lo ke me kedo en tino del artikolo ke meldi en una revista. Va eskrivir solamente lo ke pude entender de este teksto bastante syentifiko (bilimsel). Una ekipa de investigadores Beljikanos, Fransezes i Suisos, izyeron syertos... testes dizeremos. Eskojyeron dos grupos tenyendo diferentes uzansas de durmir. Los profesores de la Universidad de Liege (Beljika) lavoraron en primero kon personas alevantandosen muy temprano la demanyana. Despues kon otros tenyendo la uzansa de alevantarsen tadre.
Mezuraron sus niveles de rezistensya (dayanıklılık seviyesi) al test de atansyon. Estas aktividades del meoyo se mezuro en el M.R (manyetik rezonans). El primer rezultado despues de ora i medya, amostro ke no uvo dinguna diferensya entre los dos grupos. Verso la tadre, a la fin de 10 oras de esveles, se remarko ke los ke se alevantan tadre estan mas enerjik, mas espyertos i bien reushendo a ser atantivos en sus lavoros.
Asigun el komentaryo de los investigadores, los ke se alevantan temprano, en el korso del diya estan debasho la presyon del esfuenyo (uyku bastırmak). De sorte ke estan difisilmente azyendo atansyon i par konsekuensa, estan menos produktivos ke los otros. Esta manera komentaron, i me parese ke kale respektar esta konkluzyon. Por siguro, respektar una idea, syempre no kere dizir achetar esta idea. Por esta razon yo me detuve de adjustar mi komentaryo a este teksto.
Aki kero dar una chika notisya sientifika. En el benadam, la alternansa entre el durmir i esveles, es reglada kon dos mekanizmas ke asiguran el ritmo de 24 oras, egzaktamente komo una ora “biolojika”.
Profitando ke estamos avlando de durmir, o de repozar dizeremos, aki otrun detalyo. Komo se save, syertos paises Mediterraneos tradisyonalmente pratikan largos konjes de medyo diya. Enfrente del rezultado pozitivo de la produktivite (verimlilik), en diversos paises del oeste s’esta enkontrando de mas en mas este sistema de konje de medyo diya.
Keridos amigos, espero ke no vos enfasyi. A lo menos, oy mos ambezimos ke el ke se alevanta presto aze muncho kamino komo lo esta konfirmando la dicha. Ma tambien, agora savemos, el ke se alevanta tadre aze un kamino muncho mas largo i reziste!...
