Şavuot

Rav Yeuda ADONİ Köşe Yazısı
27 Mayıs 2009 Çarşamba

Yitro esfuegro de Moşe Rabenu, tuvyendo avizo  de todo lo ke paso dizde ke salyo Yisrael del Ejipto, i todos los miraglos ke izo el kriyador a los cudyos mezo de Moşe Rabenu tomo a Tsipora su ija mujer de Moşe Rabenu i sus dos ijos Gerşon i Eliyezer i se fue a el dizyerto al Monte de Sinay por verlo a Moşe i alegrarsen kon el i saver todas los pasajes. Arivando al Monte de Horev, mando avizarle a Moşe Rabenu su vinida tuvyendo Moşe Rabenu avizo de la vinida de su suegro, salyo de Refidim a su eskontro  el i todos  los grandes personajes de  İsrael.  Los resivyo kon grande respekto le izo los onores menesterozos. Le konto todos  los pasajes disde el diya. Ke se espartyo de el fin esta diya.

Yitro se alegro munço de sintir i bendiço a el Kiyador en rekonsyondolo por sinyor de todo el mundo.

Resivyo sovre si  de kreer en el solamente i guadrar sus enkomendansas  i kedo en el dizyerto kon Moşe Rabenu.

De todas  las glorias i milagras ke vido el puevlo de İsrael  disde ke enpeso de  ser amado de Dyos.  La mas alta i enşalşada  glorya fue la resividura de la ley santa en Monte de Sinay.

La Kuala es un pasaje muy seryozo i muy enportante en la estorya del puevlo cudyo.

Despuez de un mez i medyo ke salyeron İsrael del Ejipto en el primo diya del mez de Sivan partyeron  de Refidim i arivaron a el dizyerto de Sinay. En el monte de Klaro el  todo poderozo a el puevlo cudyo mezo Moşe Rabenu ke el kriyador  eskojo en este puevlo por trezoro.

“Vozotros vilej muy bien” dize el kriyador lo ke ize a los Ejipsyanos i komo vos truşe asta aki Kon munça siguridad en las alas de los agilas. Si vos otros kerej avedeser mis ordenes i konservar mi firmamyento de ser mi puevlo fidel. Serej muy keridos a kondisyon ke  devej ser una nasyon de Kohanim sirvitores de Dyos i un puevlo santo.

Sintenyo estas palavras el puevlo de boka de Moşe Rabenu respondiyeron todos a una metne kon un grande antusyasmo todo lo ke mos enkomendyo el kriyador vamo a ovedeser.

El diya de 6 Sivan se empeso a sintir unas bozes de trueles i relampagas, una boz de şofar muy temeroza una nueve kuvriyo al monte. Todo el puevlo se estremesyeron.

Entonses oyo todo el puevlo una boz muy temeroza afuera de la natura. Los dyes komandamyentos Aseret Adiborot.

Los kualos son las bozes de muestra santa relijyon.