LAVORAR KOMO VOLONTARYO

Myerkoles ultimo fui envitada por la parte de Meri Maya; ke es la presidente de la organizasyon GOLDEN AGE ke se okupa de los aedados.

En esta reunyon eran envitados tanbyen dos avladores muy presyozos i metros (hakim) sovre el sujeto ke van a avlar.

El primer era el onoravle presidente de antes sinko anyos de muestra komunitad Bensiyon PİNTO, i la sigunda era; Miryam MOLİNAS una dirijente muy kapache i reushida en su espasyo (alan) de una sosyetad konosida; i una volontarya ke lavora en el konsilyo de administrasyon (yönetim kurulu) de la eskola djudiya.

El sujeto era; lavorar komo volontaryos en todo modo de espasyo.

Miryam tomo la palavra en primero en dizyendo ke; “Ser volontaryo es una manera, es un modo de bivir (yaşam biçimi). Es un evenemento ke sostyene la alma de la persona (insanın ruhunu besler). Ma, malorosamente oy todo esta trokando, i lavorar komo volontaryo se esta aminguando.

En el anyo 2008 los paises unidos (Birleşmiş Milletler) izo una investigasyon (araştırma) en 15 paises sovre la situasyon del lavoro volontaryo. El rezultado de esta anket fue ke;

%4,8 la proporsyon de los ke se estan okupando de las aktivitades volontaryas.

%52 la proporsyon de los ke se estan okupando de las aktivitades volontaryas 2 – 3 oras a la semana.

%68 en la Amerika, %50 en la Hollanda,

En los paises mas pokos adelantados komo por egzempio en la Ukrayna %13, i en la Turkiya malorosamente esta proporsyon esta muy poko.”

Bensiyon Pinto el fondator de Golden Age disho ke; “Esta muy kontente de ver a las volontaryas de esta organizasyon ke estan dando servisyo a 300 aedados.

El pensa ke; kale entegrar a las mujeres de 20 – 30 anyos a estas assosyasyones.”

Kualo es la kavza ke este lavoro de volontaryo se esta aminguando?

B. Pinto disho: “Los ke van a lavorar kale ke seygan karizmatik, sempatikos i kon kara riyendo. Es nesesaryo de ser lider. La prezidensya no es emportante. Lo emportante es; ser Lider, kapo en los puntos de vista diferentes.

Las mansevas tyenen esta kapachitad. Eyas estan lavorando en kompanyiyas emportantes i etranjeras komo dirijentes.

Kale kontar i dar a entender a las personas lo ke es el lavoro volontaryo; porke si los mansevos no dan un apoyo (destek), despues de 5-6 anyos, va ver munchas difikultades en muestra komunitad.”

Miryam: “Ay dos razones emportantes.

Las kondisyones ke trokaron, el mundo kondensado (yoğun) de lavoro, porke ay un grande desvelopamyento (gelişme) de la teknolojiya. Las personas estan eskapando los echos en dando mas poko tyempo.

Ma; malgrado de esta teknolojiya muy avansada; los echos estan muy difisiles i estan tomando la enerjiya de la persona.

Estamos vyendo ke en el dor de agora; en los mansevos troko el sistem de la valor (değerler sistemi).

Los mansevos estan egoistos i estan pensando komo pueden devinir mas reushidos en el echo, mas rikos i enteramente pensando a eyos. Estan azyendo lo ke estan dezeando.

Malorosamente estas kavzas estan diminuando el lavoro volontaryo.

El tyempo ke troko, el egoismo, las kavzas ekonomikas, las distansyas de las asosyasyones, estos problemes son los mas emportantes ke estan enfluensando.”

B. Pinto: “Kale ser mas konsensyozos porke la komunitad djudiya se esta iyindo a la mankansa (yokluk).

Las mujeres estan mas reushidas de los ombres. Kale aminguar los gastes. Kale kerer byen al den frente sin azer apartamyento (ayırım).

Mozotros somos atados unos a los otros kon chukures (bağ) muy fuertes; no mos puedemos aleshar uno del otro. Kale ke agamos sakrifisyos”.

Kualo se puede azer para dirijar los mansevos al lavoro volontaryo ?

M. Molinas: “Los mansevos se estan espantando de ser volontaryos, porke no tyenen tyempo. Estan lavorando oras largas, muy duro i sin limit.

Kale darles a entender las oras del lavoro, kuantas oras a la semana van a apartar, kale saver el limit (sınır) del lavoro.

Para aserkarlos kale darles los detalyos menesterozos.”

B. Pinto: “Los ke estan lavorando komo volontaryos, kale ke veygan a los profesyonales komo iguales (eşit).

Ser volontaryo es pensar al den frente i en keryendolo byen, ayudarle a azer lo ke tyene menester. Kale konvenser al den frente.

El dirijente profesyonal (profesyonel yönetici) deve de ser objektif, kale ke sepa una lingua etranjera, kale ke kera byen a todos, kale ke tenga konfiensa en los mansevos, kale ke tenga una vizyon ancha.

El volontaryo; no aspera nada del den frente, toma plazer de lo ke esta azyendo. Es una persona ke  tyene komo buto de partajar i de reushir. El volontaryo deve de lavorar kon el profesyonal endjuntos, kale ke le de apoyo.”

A la fin Meri Maya remersyo Bensiyon Pinto i Miryam Molinas de partajar este dia kon mozotros.

Eti Pinto izo una avla sensivle por Eti Telvi (ke este en ganeden), ke era la primera presidente de las volontaryas.

Fue un dia reushido, yena de amor entre todos los ke asistyeron a esta reunyon.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın