Estamos bivyendo ermozos diyas de Primavera. Afuera ay un tyempo maraviyozo, el sol briyando i el sielo klaro. Tengo komo una impresyon ke oganyo la mueva sezon empeso mas temprano. El sol i el sielo klaro mos akompanyaron kaji toda la semana de Pesah. Afilu si el sol da, de vez en kuando un chiko entervalo, o si el tyempo ezyela un poko o vemos diyas enuvlados, ke importa?... Ya savemos ke es el mez de Mayo, kon toda su esplendor. Naturalmente no puedo dar dinguna garansiya! de tyempo klaro para kuando meldarash estas linyas... En todo kavzo, la Primavera traye kon eya, una egzaltasyon, una alegriya de bivir, una buena umor. Me akodro muy bien ke el anyo pasado, en estos diyas, no pudimos bivir enteramente esta mizma egzaltasyon de la mueva sezon. Kada demanyana ke amanesiya kon un diya klaro, no mos alegravamos tanto. Mas muncho de pensar a pasear, teniyamos el grande reselo de los diyas futuros de enverano... Un enverano kon una probavle mankura de agua. A lo menos esto era el reselo de munchos d’entre mozotros. Grasyas a los sielos, oganyo no tenemos este reselo. Tuvimos luvyas en abundansa, i los barajes estan kaji yenos. Komo lo dishe mas arriva, la Primavera mos da gana de partisipar a la alegriya, al renovelamiento de la natura. Los arvoles kon sus paruras vedres, el sol i el sielo klaro son komo manaderos de optimismo i mos envitan a la buena umor. Dizen ke buena o negra, la umor es kontajyoza. Ma oy keremos avlar solo de la buena. Amanyana puede amaneser kon un sielo eskuro, enuvlado. Afilu puede azer luvya. Esto no deve trokar muestra umor. Por egzempyo puedemos pensar ansi: “Esta luvya va ser provechoza para la tyerra...” Naturalmente muestro optimismo no va azer despareser las nuves, ma va illuminar muestro diya. Es komo djugar un poko a “Pollyanna”!... Ma, keridos amigos, de diya en diya se esta azyendo mas difdisil de djugar a “Pollyanna”. Klaro ke la vida no esta syempre de kolor “roz”. Mas i mas en esta perioda ke estamos traversando. Ya es verdad ke yo so una pura optimista, ma, so tambien i bastante realista. Ya se muy bien ke todos tenemos difikultades seya materyal, seya moral o seya problemas de salud. Kada uno i uno estamos bushkando de una manera o otra, remedyos de venserlos. İ espero ansi ke ansi vamos reushir a rezolverlos. Azeremos loores ke estamos en vida, mizmo si para syertos no es egzaktamente la vida de sus ideales, de sus aspirasyones. Yo esto kontinuando a pensar ke ay detalyos chikos, ma agradavles en la vida... Kozikas chikas komo un ramo de flor, la riza de un bebe ke mos alegran, mos dan kontentes, mos azen olvidar un poko... Ya es verdad ke las trandafilas tyenen punchones, komo la vida tyene sus penas. Ma, no mos olvidaremos ke tambien i los punchones tyenen trandafilas, egzaktamente komo i la vida tyene sus ermozuras. Terminaremos muestro moabet kon una dicha del famozo Nietzche, dicha ke es komo el rezume de lo ke dishe mas arriva: “ El Umano konosyo tanta pena, ansya i amargura, ke fue ovligado de enventar la alegriya i la riza para kompensar...”
