Da loores a la vida MOİZ

Da loores a la vida MOİZ

Dostluk Yurdu Derneği es una asosyasyon ke arekoje los mansevos i mansevas djudyos; i aze ovras  i aktivitades kulturales; komo teatros i otras kozas.

Es konosida sovre todo en el espasyo del teatro.

Kada anyo; mete a la shena una pyesa de teatro ande djugan aktores i aktrisas de todo modo de edad.

Djugeves la noche; mos fuimos kon mi marido a una pyesa ke djugo en la eskola djudiya en Ulus.

El nombre de la pyesa “HAYATA ŞÜKRET MOİZ”. (DA LOORES A LA VİDA MOİZ); se djugo kon grande reushitad grasyas a todos ke tomaron rolo, del mas chiko al mas grande.

Kuando entraj de la puerta, te demandan los bilyetos, el presidente a la entrada de la puerta vos arisive kon kara riyendo.

Aryento del salon una volontarya vos amostra el lugar ke vos vaj a asentar. De kuando entraj a la sala, ya estaj entornados de la amistad i de la kerensya de los dirijentes de esta organizasyon.

Dar este sentimyento al den frente, es una kapachitad grande, i influensa (etkilemek) a la persona.

Despues de una avla kurta del presidente; Jojo Eskenazi en el rolo de Moiz, salyo a la shena kon su manera (tarz) unika, sempatika i yena de umor.

Komo de performans!... Komo de avlar i djugar sin respirar, azyendo riyir i pensar al den frente; kon sus espris, sus djestos i sus shakaikas. El tyene una kapachitad ekstraordinarya sovre el djugo, i sus movimyentos (hareket) son una partida emportante de su reushitad.

Avlaremos de Fani Bonofiel; ke es una aktrisa muy reushida de anyos. Komo de kapachitad de pueder konkordarse (uyum sağlamak) a Jojo Eskenazi, i de pueder responderle a lo ke le dize i a lo ke le vyene al tino en akel momento. Esto es un talento (yetenek) veramente muy spesyal, i son un kuple ke se kompletan en los teatros. Eya tyene unos mimikes dulses, i los ojos avlan kon sus miradas.

La reushitad de Beti Duenyas es; de azer riyir al den frente mizmo ke tyene una ekspresyon (ifade) serioza. Kon su atitud (duruş) novle (asil), tyene un djugo partikolar, agradesido (beğenilen) por todos.

Los otros djugadores tambien; todos izyeron sus rolos mas ke byen i adjustaron una savor espesyal al sujeto de la pyesa.

Los ke eskrivyeron esta komedia, el produktor, el kapo de la shena, los ke se okuparon de las luzes i del efekt, los ke izyeron el dekor i el makyaj son a felisitar unos por unos, por la ovra ke kitaron en medyo todos endjuntos.

Los dirijentes volontaryos del Dostluk; mujeres, ombres i mansevos kada anyo krean projektos diferentes uno mijor de otro. Eyos pensan, komo i kualo pueden azer de mas bueno. Esta mirada al evenemento los enkoraja i los yeva a la reushitad. Syempre de mijor a mijor...

La amistad ke tenej entre vozotros; ke puje de dia en dia para motivar i adelantar vuestra organizasyon kon munchas reushitades...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın