En munchas sivdadikas chikas no bive entonses dinguna Komunidad Djudia. De sorte ke fuimos ovligados de aserkarmos de los aedados de la sivdad para demandarles si se akodran del sentro ande biviyan los djudios. Muy frekuente mos miravan de una manera estranya, dubyoza i de vez en kuando, kon syertas reaksyones. En vezes pudimos apanyar algunas shanses de informasyon...
Oy estamos lavorando en una chika sivdad en el Sud-Este de la Turkiya ande no ay dingun djudio desde 1960. Tuvimos la shans d’enkontrar un barbero en la Maale Djudia. El mansevo estava muy entuzyazmado de pueder ayudarmos i giarmos. Ma, no saviya si la Sinagoga egziste oy en diya. Mos izo akodrar ke ay anyos ke dingun djudio no bive aki. Alora, porke razon deviya aver una Sinagoga oy?!! Esto era su lojika!...
Portanto mos yevo a una dama aedada, moradera vyeja de la Maale Djudia. La dama, kon la kara deskuvyerta, estava vestida de manera tradisyonal Muzulmana. Kon muncha amabilidad peno a responder a muestras preguntas. En su manseves biviya enfrente la kaleja de la Sinagoga, de kuala oy no kedo trasa, mas ke la guerta orijinala. Se fraguo un otro imoble en el lugar ande se topava la Sinagoga... La dama mos konto ke djugava kon sus amigitas djudias en esta guerta. Mos maraviyimos de la memorya de esta sinyora. Malgrado los anyos ke pasaron, mos estuvo dando detalyos i informasyones prechizas. Tengo una konviksyon ke eran tambien egzaktas...
Me ekspliko en detalyo los lugares ande se topavan el Ehal, konteniendo los Rulos de Sefer Tora. Mos deskrivyo la Teva, el amplasamiento de las ventanas ets... Se akodro muy bien, espesyalmente de la ermozura del “Perahot” delantre el Ehal. Esta sinyora tan fina fue mi giadora a traverso la Maale Djudia i me amostro la kaza ande biviya un tyempo el Haham, una fragua bastante remarkavle. Vimos tambien i las kazas de sus amigitas djudias de entonses... Myentres el torno a traverso las kalejikas estrechas, remarkimos las vezinas, las amigas de muestra giadora, mirandomos de detras de las kortinas. Otras mas kuryozas le demandaron en turko kualo estavamos bushkando en estas kalejas. A la vista de sus kontentes, sus karas sonrientes, pensi ke las eksplikasyones de muestra dama fueron satisfezyentes!...
Kontinuando, mos ambezimos ke eya en su chikez los diya de Shabat iva a las kazas de las vizinas djudias para echar un ojo a las ornayas i lumbres... Se akodro de la Suka en las guertas i de las gayinas ke degoyavan en las fyestas importantes... En supeto vide una luz de alegriya en los ojos de mi giadora. Me disho ke se akodro de la “galeta yevrek” ke komiyan los djudios una vez al anyo. A mi demanda si estava avlando de la “Matsa”, disho si, se emosyono i me demando si tengo un poko de “Matsa”.. Malorozomante estavamos en Novembre... Mankava muncho para Pesah...
Manadaro: The Historic Synagogues of Turkey
Keridos lektores, en estos diyas de Pesah, mi idea era de eskrivir un artikolo apropriado, en akordo kon Pesah. Me pensi ke el teksto del Sr. Joel Zack, mizmo si no es direktamente, de una manera esta evokando muestra fyesta del mez de Nisan.
