El museo “Rahmi KOÇ” i el eskrivano “Zülfü Livaneli”

Şeli GAON Judeo-Espanyol
25 Mart 2009 Çarşamba

La semana pasada tuve el plazer de vijitar el museo “Rahmi Koç”; ke es el primer museo konsakrado a la istorya de la Sirkulasyon (Ulaşım), de la İndustria i de la Komunikasyon (İletişim).

Se puede topar aki; miles de kozas, ke es difisil de pensar mizmo. Ay una koleksyon inkreivle; de una alguja de gramofon fina vapores grandes, de dimensyones verdaderas, aviones i munchos otros objetos.

 Lo ke me empresyono lo mas muncho fue; las

Kamaretas Minyaturas, “Minyatür Odalar”.

El represante aktivo del arte minyatura en muestra epoka es “Henry Kupjack”, ke tyene un talente espesyal i muy orijinal en este sujeto.

En el museo de Rahmi Koç; el artisto Henry Kupjac ekspozo las kamaretas minyaturas perfektas ke estan manyetizando (büyüleyici)  a la persona.

Entre vente kamaretas ekspozadas, se puede ver: todos los detalyos ke son konformes al orijen (aslına uygun), las partikolaridades arkitektural (mimari özellikler) de los anyos ke apartyenen a los sieklos 17, 18 i 19.

Entre estas; la minyatura del teatro Wintergarden de los anyos 1940, i la kamareta de echar del treser presidente Amerikano Thomas Jefferson del anyo 1770 son muy reushidas.

Entre las diferentes kamaretas; / El restorante Amerikano kon mobles kolorados 1942, / La kamareta de echar en el palasyo Ptolemi, / Una kamareta de echar Franseza 1850, / a kamareta de komer de Louis 16, / El mupak de la kaza Japoneza 1700, / La kabina del kapitan en 1680 muy enteresante, / El salon kon eskaleras de Montmorenci 1830, / La kamareta de asentar de New Orleans 1850, / El studyo del artisto en 1950 en New York, / El bar i el salon de bayle de San Francisco 1885, / El vagon pulman 1893 i la kavane de los ottomanos del sieklo 18, la kuala la izo regalo al museo.

Fue un dia enteresante i inolvidavle para mi i mi marido.

Dia de myerkoles, en el salon del jurnal “ŞALOM” uvo una reunyon kon 70 mujeres ke envitaron el eskrivano famozo “Zülfü LİVANELİ” para diskutir su livro ultimo “SON ADA” (la İsla Ultima).

El eskrivano fue resivido kon su kantika “LA LİBERTAD” todas kantando i aplodisando.

El fue muy emosyonado i remersyo a la komunita.

Despues ke una amiga avlo por su personalidad, sus ovras i su grande kultura en todo modo de espasyo; le ampesaron a demandar, demandas en sujetos diferentes. Demandas de su livro, en el sujeto de la politika, de la ekonomia, i de la sistema de la edukasyon en la Turkia, i otras...

Muy kalmo i kon la kara riyendo dyo las repuestas menesterozas kon plazer i satisfaksyon. El termino su avla en dizyendo ke; todas las mujeres seygan kultivadas komo las ke asistyeron a esta reunyon.  Fue un dia kultural muy reushido yeno de saveduria (bilgi) i todas salimos de aya kontentes i satisfezadas.