Otruna vez el 14 de febrero

Coya DELEVİ Judeo-Espanyol
11 Şubat 2009 Çarşamba

14 Febrero, la St. Valentine o kon el nombre ke lo konosemos aki, el Diya de los Enamorados... Se eskrivyo, se avlo tanto sovre este sujeto, kero dezir sovre el “Amor”, ke no se kualo se puede adjustar mas. Yo por ampesar me va aprovechar de una kantika ke dize ke el Amor es una vyeja mentira!... Ke pensash?  Muy probavle esto seriya dicho por akeyos septikos ke no kreen en el Amor, i mizmo dizen ke no egziste afilu... İ ay una otra kantika en italyano ke dize efektivamente ke no egziste el amor. Enfin, no es mi idea.  Ma, portanto eskrivi unos kuantos versos para estos septikos:

EL AMOR, UNA MENTİRA!!..

Kero saver si ay alguno / Si... alguno ke me dira... / Kero uno, solo uno / Una, uno ke atorgara / Ke nunka, nunka avra / Amores sin mentira. / Deke kada amor i amor /Deve ser kavza de dolor? / Deke despues tanto kerer / Espartisyon sin mas volver? / Si krees ke el amor ansi es / Yo te digo: “ No me ames!!!”

Ay unos ke afirman ke el amor es un regalo ke aze la vida a la persona. Ma, munchos no lo arresiven syempre este regalo o no saven ande bushkarlo. De mi parte les digo a estas personas de no pyedrer esperansa:

EL AMOR...

Saves komo de koza es? / Es olvidarse, korrer, korrer, / Detras d’un ombre, una mujer... / No saves ande va apareser / Ni kuando lo vas a konoser. / Puede ser oy, o amanyana? / Ken save? / Una tadre, una manyana? / Ken save? / No kedes tu de esperar, / Un diya lo vas enkontrar...  Keridos amigos, no ay dubyo todos savemos ke en todas las epokas, el sinonimo de “Amor” fue syempre el “Romantismo”. Malorozamente, i esta nosyon aktualmente se esta dejenerando. No es entonses el romantismo de las kantikas, de las poezias, de los filmos o romansos de al tyempo. Naturalmente no esto enyegando, ke i de muestros diyas ay eksepsyones. Avansando en edad, ganando sezudeza kon sus eksperyensas i observasyones, la persona esta pudyendo dar muevas sinyifikasyones a kualkyera nosyon, ansi ke al amor.

Yo nunka de mi vida, pude dar una definisyon neta de este byervo. Nunka lo kije limitar kon dos, tres byervos o aprezarlo puede ser, aryento de un kuadro estrecho. Ma oy, kon los anyos, a la luz de una larga perioda de union, me parese ke ya tengo el derecho de dar mi propia idea sovre esta nosyon. Bueno, asigun mi, este byervo chiko de kuatro letras (afilu tres en turko!), en realidad no kontiene muncha koza. Semos mozotros, sos tu ke lo vas a inchir en bivyendolo. No ay ke dezir, es verdad ke se ampesa kon romantismo, d’akordo. Esto mizmo achetando ke el romantismo aze la vida mas ermoza. A poko, a poko, kon los anyos vas adjustar al romantismo, kerensya, amistad, entendimiento, konfiensa resiproka, pasensya (un elemento indispensavle en la union)... Vyene lugar, deves azer sakrifisyo al menester... Tambien deves azer prova de una grande tolerensya i kontinual kudyo... Enfin saver partajar las penas, las ansyas komo se partaja las alegriyas. Egzaktamente komo lo eksprimi, para mi el “Amor” deve ser la meskla de estos todos sentimyentos. Atansyon! Esto es valivle para una oroza i larga union, i puede ser la yave de la felisidad.