El 07.09.2008 alhad, fue un diya reushido: El diya Evropeo de la Kultura Djudia de Estambol.
Este diya fue yeno de aktivitades enteresantes.
Demanyana; asisti al koro ke dirijo el shef Cako Taragano. Este koro es kompozado de 8 ombres, kon 7 mujeres, i 5 personas del grupo de enstrumento de muzika (saz grubu). Este grupo esta dando konsertos reushidos en la Turkiya, i afuera del pais.
Aviya muncha djente ke vinyeron a sintir estos hymnos sefarades (sefarad ilahileri), ke aze akodrar a la persona su manseves i el tiempo ke ya paso.
A la fin; los partisipantes (katılımcı) emosyonados aplodisaron de alma i de korason.
En la sinagoga Ashkenaz; Renan Koen dyo un konserto de piano.
La Soprano Linet Shaul persigo (takip etti) Renan Koen; kon un konserto maraviyozo; ande eya kanto, kantikas en ladino.
La sorpreza (sürpriz) de este konserto fue; ke Linet Shaul tomo en sus brasoz su ija de kuatro anyos para kantar la kantika “Una ija bova tengo”, kon una armonia (uyum) ekstraordinarya.
Entremientes; Linet Shaul dyo un konserto kon Alper-Albert i Tracy D. Aziz kon kantikas populares de djudeo espagnol.
Despues de midi ; el konserto de Yinon Muallem, ke es de orijen (kök) İrakyano ; ke adjunto la musika de l’Anatolia kon la musika İrakyana.
El refleto (yansıttı), un stil partikolar (özgü) kon los enstrumentos de perkusyon turkos, i kon los enstrumentos de perkusyon de la İndia.
Aviya tanto djentorya (izdiham), ke todos no puidyeron entrar a la sinagoga italyana.
En medyo del konserto los de aryento salyeron afuera, i los de afuera entraron aryento para pueder oyir, i las palmas (alkış) kontinuaron fina la fin del konserto.
La ekspozisyon de pintura (resim sergisi) de Bubi; en Schneidertemple, muy enteresante ma; difisil a entender.
El esta kortando tiras (bantlar) de los papeles de los jurnales; i los esta enduresyendo (sertleştirmek), kon la tintura (boya) de seluloz; i kon estas bandas esta azyendo tablos, ke esta enklavando enriva klavos i pedasos de metales.
Uvo en Neve-Shalom una ekspozisyon de djoya (takı) de Sabrina Fresko ke es una architekta. Eya esta azyendo; djoyas muy grandes (dev boyu) ke esta eksprimyendo (ifade etmek) la eternidad (sonsuzluk).
Por egzempiyo; unos aros (halka) de metal ke estan pasando uno aryento del otro; muy orijinal i muy diferentes.
Una ekspozisyon de estatuas (heykel) de Eti Behar ; kon motivos de personas alargadas endjuntos, unos allados de otros.
La ekspozisyon de estatuas de Beti Cenudioğlu ; estatuas multikolores de bestias de gaynero (kümes hayvanları).
El diya se termino kon una boda ke se reprezento por el kuple Linet i Cenk Rofe ; ke selebraron sus primer aniversaryos de sus kazamyentos.
El diya de boda es sakro por kada famiya djudiya i tyene una emportansa primordial.
La sinagoga Neve Shalom; es la sinagoga la mas grande i emportante de muestro pais.
Las luzes, las rozas, la dekorasyon de aryento, la regula de las bozes (ses düzeni); todos estos detalyos son emportantes para esta seremoniya ke tyene lugar el diya del kazamyento.
La musika empesa kon la entrada del novyo, i fin a la fin kontinua sin kedar.
Las famiyas Barokas i Pardo echaron tallet a los mansevos i estava djusto komo una boda verdadera.
A la fin, en el sentro cultural de Neve Shalom; el Presidente Onoravle de la perioda pasada de muestra komunitad Bensiyon PİNTO; publiko un livro ke lo estava sinyando a kada uno i uno apropriado.
Malorosamente, las oras ke estava yo aya, ya no aviya kedado ni un livro.
Todos devemos de merkar este livro para dar apoyo (desteklemek) a Bensiyon Pinto; ke es veramente una persona; entelijente, enstruido, kapache, adjideoso i apiadador. El es enteresado de todo modo de evenemento ke puede afitar a las personas de su komunitad i akude (yardıma koşar) de alma i korason.
Kero felisitar a todas las personas ke aparejaron este diya inolvidavle, i ke mos ayege el Dyo para kada anyo mijorado...
