El Arte de la pintura komo lo savemos, tiene diversas variasyones. Entre otras, puedemos sitar la Karikatura. Esta semana, en muestro kanton pensi de mensyonar dos karikaturistos ke desinan en el “Şalom”, bien konosidos de muestra Komunidad. Son tambien artistos internasyonal. Si no me yerro, en la pajina de Arte de muestra revista “El Amaneser”, se tyene publikado roportajes kon eyos. Ma, no esto sigura kuando.
Yo, en este kanton miyo no tengo entisyon de azer roportajes, lo ke es bastante difisil para mi. Mi eskopo es prezentar de vez en kuando, diversos artistos de muestra Komunidad... Artistos de diferentes ramos, i dar otruna vez chikos detalyos o informasyones sovre eyos.
Los lektores del “Şalom” konosen muy bien İzel Rozental i İrvin Mandel. El primer kon su eslogano “ Tünelin Ucu” (La Fin del Tunel), el sigundo kon “La Famiya Mozotros”. Ampesando kon İrvin Mandel, kero dar una kurta biografiya. Nasido en Estambol en el anyo 1956, izo sus primeros estudyos i eskapo el liseo en esta sivdad. Kontinuo a estudyar en la Suisa, ande izo estudyos altos. Torno a la Turkiya en 1985.
En el mizmo anyo ampeso komo karikaturisto en el jurnal “Şalom” kon diversos desenes. Fue en el anyo 1992 ke ampeso a la seriya “La Famiya Mozotros”, ke oy en diya estamos meldando kon grande plazer, i siguro una chika sonriza inevitavle. Estas karikaturas dan la impresyon de ser komo una “banda desinada”. Kon su espirito umoristiko Mandel supo krear un model, un eshantiyon de la famiya Sefaradi de muestra Komunidad... Ma, no syempre un egzempyo!...
Se trata de la Famiya Mozotros. En sus desenes, o mas egzaktamente, a traverso las palavras, los propozitos de sus eroes, se puede muy bien apanyar la umor. Ma, asigun mi, en desparte de la vanda umoristika, se remarka una syerta doza de una kritika muy fina... Komo kritikar el komporto, la manera de bivir ets... de syertas famiyas. Esto es puede ser mi opinyon, porke i yo tambien, en vezes ago kritikas asemejandosen o kaji!... siguro de mi para mi!...
Despues de aver terminado sus estudyos, İrvin Mandel torno a Estambol, kon el diploma de “Turismo i Hostelleriya”. Estuvo por un syerto tyempo en el mundo del negosyo. En los presipyos de 2000 ampeso a lavorar en el sektor de Turismo. Ultimamente kito su sinken (5.) livro, un album de karikaturas. En desparte, en el suplemento “Şalom” kitap, tratando de livros i publikasyones muevas, enkontramos tambien los desenes umoristikos de İrvin Mandel...(a kontinuar)
