La ventana de vuestra ermana / El “BALO” de la Mishne-Tora

La ventana de vuestra ermana / El “BALO”  de la Mishne-Tora

Sintimos syempre de muestros paryentes; ke en el tyempo pasado, solamente dos ovras emportantes aziyan balos empresyonantes.

Estos balos eran organizados de la parte de Or-Ahayim i de la Mishne – Tora.

El ultimo balo de la Mishne-Tora, tuvo lugar en1972, paso kaji 36 anyos fina oy.

El Konsilyo de Administrasyon (yönetim kurulu) ke se troko muevamente en la Mishne; tomo esta desizyon kon muncho koraje i konfiensa (inanç).

Kreyer esta organizasyon grande para pueder trayer boz en la komunitad,  para arribivir el nombre de la ovra fue; el resultado del esforso de un grupo de mansevos, ke lavoraron kon muncha ardor para reushir.

La amor de la persona, i la kreensa ke kada kriyatura deve de tener el derecho de una enstruksyon (eğitim) perfekta; izo arekojer tantas personas en esta nochada inolvidavle.

La Mishne-Tora se fondyo en el anyo 1898. Su buto era de topar doktores i kuras, melizinas a los hazinos menesterozos. En el anyo 1914; empeso a dar las komidas de midi a los elevos guerfanos de la eskola, i una vez al anyo darles vistidos.

Entremientes; lavoro anyos kon una kapachitad perfekta, i en el anyo 1992; el lugar (mekan) se transporto (taşındı) al apartamento ande esta lavorando oy en diya.

El buto de esta ovra es; dar una enstruksyon buena al elevo menesterozo, edukar (eğitmek) a su famiya, i afrontar (karşılamak) todas las nesessidades de las kriyaturas.

Antes anyos la Mishne-Tora teniya komo dover; dava a komer las midis en la eskola djudiya a todos los elevos i ansi teniyan una vitrina de lo ke estan azyendo.

Despues ke la eskola se fue a Ulus; este derecho se dyo a otra ovra.

Ansi es ke la ovra la mas vyeja de la komunitad ; la MİSHNE-TORA ovra de 110 anyos; fue kaji olvidada por muncha djente.

El konsilyo de administrasyon dyo esta misyon (görev) de esta grande organizasyon; a un grupo de mansevos i mansevas; ke diskutyeron para trayer un artisto muy famoso; ke va atirar la atansyon de las personas de muestra komunitad.

İ enfin eskojyeron (seçmek) el kantador selebro “DANNY BRİLLANT”(Dani Kohen).

Para puederlo trayer; su menajer Erkan Özerman peno muncho; i izo todo el posivle para arivar a su buto. Kon su ayudo, todo fue mas fasil.

El Grande Rabino Rav. İsak Haleva, el Presidente de la komunitad Silvyo Ovadya i 750 personas assistyeron a esta nochada ke tuvo lugar en Hilton i fue maraviyoza.

El organizator de este balo Alper Behar; i el muevo presidente de la Mishne-Tora Roni Rodrig; arisivyeron a los envitados kon la trankilitad i el kalmo de la reushitad.

Rav. İ. Haleva i Silvyo Ovadya felisitaron a todos los dirijentes por esta ermoza organizasyon.

Dani Kohen dyo un konserto ekstraordinaryo kon su orkestra . El sujeto del konser era:

“Keres baylar kon mi?”. Por esta kavza el envito a la djente a baylar a la shena; i fina la fin del konserto, eyos baylaron kon grande plazer.

El kantador Danny Brillant es de orijin Tunizyano (Tunus), i el kanto en fransez, ingles, italyano i en ebreo.

El mas grande salon de Estambol, “Hilton Convention Center” estava yeno de djente.

Esto mos mostra; ke kuando se dezeya una koza de aryento del korason; kuando se kere kon kreensa; no ay safek para no reushir.

Para reushir kale pensar grande; lavorar kon esforso, i apresyar lo ke esta azyendo el den frente.

Muevas personas es mueva sangre. Pensar de una manera diferente, trayer una luz; una idea emportante a la ovra kon koraje i veluntad (azim).

Los dirijentes de la Mishne-Tora; deven de sintirsen orozos; de este muevo grupo ke se fondyo.

Los felisitamos; de alma i de korason por sus arivos a sus butos...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın