BAMİDBAR

Rav Yeuda ADONİ Köşe Yazısı
28 Mayıs 2008 Çarşamba

İ avlo el Kriyador a Moşe en la tyenda de plazo (Mişkan).

El Kriyador nos dyo a nosotros la Toraen el dezyerto entre el fuego i la agua. Por ke en el dizyerto? Dizen nuestros savyos: Por el merito de el fuego ke se vido en el monte de Sinay, komo esta eskrito en la Tora ElMonte de Sinay estava entre los umos. Por el merito de la agua, komo esta diço: "Tambiyen los syelos gotearon agua." İ por el merito ke se adereso el Kriyador a nuestros padres en el dizyerto. Komo meldamos en la Peraşade Bamidbar.

La Tora se asemejo a la agua, komo la agua abaşo de las alturas a luguares başikos, ansi la Tora no se aserka a los personas ke tyenen orgolyo. Por esta razon la Tora, la resivimos en un monte başiko. Por azermos enbezar ke la Torase afirma en akeyas personas ke son umildes, leşos de el orgolyo. Tambien la ley se asemejo a el fuego sigun el verseto, las enkomendansas son una kandela,  la ley es una luz.

La Ley arelumbra, a la persona el kamino de las vidas, i el kamino ke deve suivar. Dizen nuestros savyos: El eskopo de la sensya es Teşuva, arepintimyento de los yerras, i azer eços buenas.

La Tora mampara i eskapa a la persona de su apetite el malo. İ de mas la razon ke se dyo la Tora en el dizyerto, es por enbezarmos, de tener la figuzya (avtaha) en el Kriyador. La prosperidad de la persona esta de kalgada en el kreyensa la persona ket yene la figuzya en el Kriyador deve de estar siguro ke ninguno no le puede azer ningun mal i tendra syempre munço bueno.En la Tora tenemos munças enkomendansas por afirmar. Por afirmar las enkomendansas deve tener la persona dos fuersas diferentes. El prima ordiento deve tener un fuego segundamente un antusyasmo.

La persona para azer lo bueno i aleşarse de lo non bueno deve de posedar un korason dereço i apegado kon el todo poderozo.

El kaminar en el kamino de la Tora, aleşarse del egoismo, la amostra a la persona las verdades. En el korason de la persona reyna dos fuersas, el antusyasmo i ser presurozo i la fuersa de ser repozado i pasensyozo. Nuestro dover es de pueder enpleyar estos fuersas en su tyempo i en el luguar custo. Estas fuersas las puedemos topar en el kamino de la Tora.