Adar es el sejen mez de la Kreasyondel Mundo, a partir de Roshashana. Komo la mayoriya de nombres de mezes ebreos, tyene un orijen Babilonyano sinyifikando “granero” (tohum). Los kampos se aparejan a la sembradura. Adar, ultimo mez del invyerno, es tambyen oskuro, enuvlado... Nuves i eskuridad no es impedimyento (engel) para la alegriya del mez. En Adar, munchas maraviyas se kumplieron para el puevlo Djudio. El mirakolo de Purim es uno de estos. Keridos amigos, komo lo savesh, oganyo tenemos dos mezes: Adar i Veadar. Estamos en el anyo del doble mez , nombrado tambyen , “Shneiadarim”...Me parese ke devemos dar una eksplikasyon. El Kalendaryo Ebraiko, bazikamente “Lunar”, es en akordo kon el torno de la Luna, al derredor de la Tyerra (Dünya). Torno kompletado en 354 diyas, kere dezir 11-12 diyas menos kel Kalendaryo “Solar”. Para adaptar el anyo lunar al anyo solar, se adjusta aproksimativamente (aşağı, yukarı) kada 3 anyos, otrun mez de Adar. El fondamyento (temel) es azer koensidar la fyesta de Pesah, kon
la Primavera. En
el entervalo de un siklo (süreç) renovelado kada 19 anyos, se adjusta 7 vezes un mez adisyonal. El anyo 5768 ke estamos bivyendo, es un anyo de 13 mezes kon 383 diyas. Para kualkyer no konosyendo el sistema lunar, un mez de 383 diyas puede pareser estranyo!... Se esta aserkando Purim, el Taanit Ester, siman importante de esta fyesta. Avlaremos un poko sovre los “Ayunos”(oruç) en jeneral, i sus eskopos...
En el Kalendaryo Ebraiko ay diversos diyas de azer taanit. Ke pueden ser sus razones o sus objektivos?.. Puedemos arrekojerlos en tres kategoriyas:
1)- “Arrepentimyento” (pişmanlık). 2)- “Rekuesta” (dilek). 3)- “Komemorasyon” (anma), tres eskopos prinsipal del ayuno. Si kada taanit los inkluye, por siguro uno de estos deve tener mas grande importansa. Me vo referar a una sitasyon tresladada de una revista djudia:
“Entre todos los diyas de ayuno ekspresados en muestro kalendaryo, uno solo es indikado (belirtilmiş) en la “TORA”: Yom Kippur, diya de Arrepentimyento. En echando un ojo a muestra Historia, vemos las trajediyas, las sekanas terrivles ke konosyo el Puevlo Djudio. Rambam mos dize:“Arrogar al Todo Poderozo para ke mos salve de una desgrasya, es una Mitzva ekspresada en la TORA.” Akiel buto es demandar ayudo, una Rekuesta... Todos konosemos estos ayunos de Komemorasyon: Tamuz el 17 (Shiva asar be Tamuz)- Av el 9 (Tisha be Av)- Tevet el 10 (Asara be Tevet) i Tsom Gedalia, el 4 de Tishri. Estos ayunos de Komemorasyon de las trajediyas, son de manadero Rabiniko...”
Oganyo, ampesando kon el Taanit Ester en el 13 Veadar, estamos selebrando la fyesta en el 14, i el Purim Shushan en el 15 Veadar. Shushan era la kapitala del İmperyo Persano. “...Andad i arrekojed todos los Djudios de Shushan, azed taanit vozotros por mi. Yo i mis donzeyas azeremos taanit de mizmo...” (Ester: 4-16)
La estorya de Ester ke todos konosemos muy byen, mos ensenya un milagro. Kada anyo repetarla, estudyar tambyen los livros de la TORA, mos ambeza la Historiade muestro puevlo, ken semos, de ande vinimos, ande vamos... Esto, par konsekuensa mos yeva a akodrarmos de muestras raizes, muestra lingua, muestras tradisyones i el dover de nunka olvidarlas... Meldi un teksto sinyado L. Koppelman Ross. Pensi ke va ser un buen final para mi artikolo. La autora eksplikando komo la Historiade Purim gia para bivir en la Diaspora, adjusta: “El livro de Ester mos mostra klaramente ke no es nesesaryo de abandonar el Judaismo para progresar politikamente o profesyonalmente. Se puede ser un sivdadino leal i en mizmo tyempo, un buen Djudio pratikante...”Bivir komo Djudios en la Diaspora, ma rekonoser tambyen la influensa de otras kulturas, ke pensash keridos amigos?... Mis sinseros suetos de un “PURİM ALEGRE”...
