Pikude

Rav Yeuda ADONİ Köşe Yazısı
5 Mart 2008 Çarşamba

5 Peraşiyot de la Tora, Teruma, Tetsave, Ki Tisa, Vayakel, Pikude, nos entretiene, kon la fragua del Mişkan, santuvaryo portatif ke sirvyo 40 anyos, en el dizyerto, i duro totalmente 480 anyos asta la fragua del Bet Amikdaş de la parte el rey Şelomo, en el anyo 930 antes de la era aktual.

La nasyon Cudiya no tenia el menester de la fragua del mişkan. En la konsensya i konosensya de la fey Monoteista no resive ningun objeto konkreto (somut) la Honra de D... podesta en el mundo entero, la fey cudia “de un D...” no tyene el menester des sembolizarse en ningun objeto, i no kere diço, de “aprezar” (hapsetmek) la devinidad en un lugar estreço. “En lo demut aguf veeno guf” no tyene kuerpo ni asemejensa de kuerpo “Melo Kal aarets kevodo La Honra de D... podesto” i se topa en el mundo entero.

El nesesito, de la fragua del mişkan, fue dospues del pekado del bezero de oro.

El puevlo no estava apto a la fey Monoteista komo lo konosemos (i dimos a konoser, al mundo entero...) el retardo de Moşe del arivo del monte de Sinay, su absensya malorozamento kavzo, a ke el puevlo buşka un atadero konkreto para ayegar a la fey de D... Eyos estavan en la enfluensa de la dolatriya Egypta, i de todas las nasyones ke endoravan a Eyos.

Es por esta razon, ke nasyo el nesesito de fragua del Mişkan la partida la mas pozitiva fue, la jenerositad ke mostro el puevlo a la demanda de Moşe de vinir al ayudo de la fragua kada uno sigun su poder, ke enteresantel el verseto mansyona la emosyon ke tuvo el puevlo, a la fragua del Mişkan kon los byervos “veem eviu elav od nedava BABOKER BABOKER” “eyos truşeron sus donos DEMANYANA DEMANYANA.”

Ke grande jenerositad! Ke esprito riko! Es enteresante de mansyonar tambyen, el puevlo vino al ayudo kon sus donos.

“Vayormeru el Moşe lemor, marbim aam leavi...” i dişeron a Moşe el puevlo truşo munços donos i ya es sufizyente al lavoro... Moşe fue ovligado de enkomendar al puevlo truşo munços donos i ya es sufizyente al lavoro... Moşe fue ovligado de enkomendar al puevlo de no trear mas... (kaza muy rala en la istorya, de dizir no tenemos, mas menester de donos). Esta fakultad de jenerositad se enraygo en el karakter de la nasyon, durante la istorya, en kada komunitad del mundo Cudyo, el esprito de fraguar ovras de bienfezensya, kon diferentes nombres, fue la bandyera del mundo Cudyo. Dar es mes diffisil de tomar.

Esta lisyon nos se degaja del Mişkan.