Alüminyum Hurda Geri Dönüşüm

A muestros lektores...

A muestros lektores...

El anyo pasado, en esta mizma oja del No. 25, yo aviya eskrito: “El Amaneser” Kompleto Dos Anyos...” Paso entonses 12 mezes i estamos ampesando al 4. anyo. Esto es la preva de una reushidad ke mos glorifika. Estad siguros, keridos amigos, esta reushidad no apartyene solamente al kuadro de eskrivanos, redaktores, editores ets... Lo esto repetando, es vuestro entereso ke mos da el entuzyazmo de eskrivir. Es vuestra fidelidad ke mos da la fuersa i el “doping” para kontinuar en este kamino.

Komo lo savemos, el “Pilar” es la kolona esensyal ke sostyene un edifisyo. “El Amaneser” poseda un triple pilar, un “trio” inkomparavle: Karen, Güler i Semra. En vezes penso, si Karen no aviya tomado la inisyativa de kitar una revista, es ke “El Amaneser” iva naser? Naturalmente no esto enyegando el rolo prinsipal de la kerida Karen, ma, asigun mi , Güler Orgun es tambyen sinonimo de “El Amaneser”. La infatigavle, admiravle Güler. Dinguno mas ke mi se topa en pozisyon de byen konoser su efikachidad. So oroza de aver topado la posivilidad de lavorar kon eya. I enfin muestra maraviyoza amigita Semra Sevinç. Una virtuoza del klavye de la  komputadora. El kompleto dezinyo tekniko i la “mise en page” pasa por su mano...

Muestra revista selebra su aniversaryo en el presipyo de Marso.

Es una oroza koensidensya, porke el 8 Marso es tambyen el “Diya Internasyonal de los Derechos de la Mujer”. Es una aktividad ke no tuvimos la oportunidad de mensyonar aki asta agora, i ke  merese un artikolo espesyal. Portanto kero adjustar aki unos, dos byervos sovre este diya. Kualos son estos derechos de la Mujer , ke se avlan tanto?... Me parese ke una definisyon komo la sigiente, no va ser yerrada: “Estos son la totalidad de los derechos ke asiguran a la Mujer, igualidad kon el Ombre, en todos los domenos de la vida kolektiva i profesyonal”.

Son derechos fundamentales akordados por organizasyones internasyonales, i legalmente protejados por dokumentos. Bueno, kuantas mujeres reusheron a obtener sus derechos? Puedemos responder: “Munchas!” Egzakto, munchas, ma no todas. Teorikamente la igualidad parese egzistir. Es ke se esta vyendo en la pratika? Es difisil de responder afirmativamente. Un chiko egzempyo, antes de ir mas leshos: oy en diya ay un apartamyento en syertas profesyones. Ma no es esto lo peor.

En syertas komunidades, presyones tradisyonal i (o) relijyozas, konstituan grandes obstakolos delantre la emansipasyon de las mujeres. No tyenen libertad, o una relativa. Son maltratadas, despresyadas. Naturalmente, esto es un aspekto espesyal de la kestyon i una yaga. Por siguro ke en todas las partes del mundo, las mujeres kumplieron grande evolusyon. Mizmo si por la ora son en minoridad, las estamos vyendo en diversos terrenos profesyonales. En la Administrasyon, Politika, Medikeriya, en la Mediavizual i eskrita ets. Mos aze grande plazer este tablo pozitivo.Si echash un ojo a un kualkyer numero de muestra revista, remarkarash, aparte del kuadro de eskrivanos bazikos, una mayoriya de sinyaturas femininas. Esto es una konstatasyon minima ma absoluta, de la evolusyon de la “Mujer Djudia” en jeneral, i de la “Mujer Sefaradi” en partikolar, partisipando al adelantamyento i “emansipasyon” del Siglo. Es imposivle de enumerar todas las mujeres valorozas en la Diaspora, i aki. Estan partisipando a la misyon ke mos dimos, de propajar la Kultura Sefaradi, egzaktamente komo disho el Dr. David Azikri:  “La misyon de “El Amaneser” i de los ke se dedikan a mantenerlo, ayuda a krear una esperansa ke el Judeo-Espanyol no disho su ultima palavra...”

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın