En vezes es difisil, afilu de eskrivir...

Coya DELEVİ Judeo-Espanyol
31 Ocak 2008 Perşembe

“Oy en diya vamos demandando: kualo es Auschwitz?... Un final o un empesijo? O, un aborresimyento alimentado kon senaryos de komploto, kon kampanyas kontinualas manchando, kalomnyando un puevlo?.. O, puede ser, una vizyon de la vanda diabolika del karakter umano?..”

Elie Wiesel

Reelmente difisil... Oy, 27 Enero Alhad, kero aparejar mi artikolo.La mano no me se esta indo a azer un teksto alegre. Mizmo si la mano se va, el korason no esta achetando. Porke oy es 27 Enero, diya importante de akodrarmos... Estamos komemorando la Liberasyon de Auschwitz, por las armadas Rusas. Sigiendo la dechizyon ke tomo la Asamblea Jeneral de las Nasyones Unidas en Novembre 2005, el 27 Enero gano una amplor internasyonala en tal ke data de Komemorasyon de  las viktimas del Olokosto... Oganyo la tema es: “İmajina-Akodra- Reflekta-Da reaksyon”. Myentres las aktividades de oy (aki),los oradores van avlar sovre: “El Olokosto i las Kriaturas” ansi ke “

La Singularidad del Olokosto”. E program inkluye tambyen, la projeksyon del filmo” The Wave” ( La Ola)... Por esta razon, kedando en la atmosfera, empesi kon una sitasyon del ilustro eskrivano Elie Wiesel, uno de los sovrebivyentes de la “Shoa”. Alora, porke no kontinuar kon el, kon su  kurta biografiya? Wiesel nasyo en Septembre 1928, en una chika sivdad de la Rumaniya. Todasu famiya fueron embiyados a Auschwitz, ande su madre i la ermanika fueron eksterminadas. Elie konosyo los kampos de konsentrasyon de Birkenau, Monovitz, Buchenwald, ande lo mandaron djuntos kon su padre, ke poko despues fue matado...

Elie Wiesel, sovrebivyente de la Gerra, se topo entre los 400 ijikos reskapados de Buchenwald ke refuzaron de retornar a la Evropa Sentral...El konosyo el inferno i kualo de mas natural de relatarlo en sus ovras? Portanto, relata la “Shoa” kon una ekspresyon simple, ma pasyonada. Da nombrozas konferensyas sovre las penas, sufriensas de los Djudios i otros puevlos durante el “Génocide”(Soykırım). Su manera  es leshos de ekspresar aborresimyento. (nefret) El desaprova i blama (kınamak) la violensa. Su aserkamyento (yaklaşım) universal a la kestyon, lo izo loreato del Premio Nobel de Paz en 1986... “Shoa”, el “Génocide” de los Djudios, sinyifika la totalidad de las kulpas kometidas sovre un grupo etniko-relijyozo. En 1944, un avokato Djudio, Raphael Lemkin logro para pueder dar un nombre i una sinyifikasyon a la Politika Nazista...Una politika de eliminasyon kompleta de los Djudios Evropeos...“Etimolojikamente, el byervo “GENO” en grego sinyifika rasa (ırk). İ el byervo “CİDE”, en latino, (atansyon! no se trata de Ladino) sinyifika asasinato (cinayet). El Sr. Lemkin, en adjustando estos dos byervos kreo el byervo “Genocide”. Este termo (terim) fue uzado por primera vez myentres los Djuzgoz de Nurenberg.” Paragrafo tomado delteksto de Metin Delevi “ Soykırım İnkarı üzerine bir İnceleme”( Un Analiz de la Negasyonde la Shoa). 

Empesimos muestro teksto kon los propozitos de Elie Wiesel. Azeremos i el final kon sus palavras ke estan en la paralela de la tema de oganyo: “Mozotros, personas liberas, devemos refuzar kategorikamente la alternativa de kedar sin reaksyon... No mostrar dinguna reaksyon, syempre ayudo el agresivo, ma nunka las viktimas...”