27 Enero1945...

Coya DELEVİ Judeo-Espanyol
23 Ocak 2008 Çarşamba

Esta es la data de la liberasyon por las fuersas aliadas, del Kampo de Konsentrasyon Auschwitz, nombrado komo “El Kampo de la Muerte”. Se eskrivyo muncho sovre la “SHOA”, se izo filmos, se izo i se esta oy en diya azyendo investigasyones... En una kontinual bushkida de testimonyos de akeya epoka terrivle... Auschwitz es el simbolo de la grande trajediya inumana, de la salvajeriya del 20. Siglo, ke nunka devemos olvidar. Vamos mensyonar, vamos eskrivir i repetarla asta la fin de los tyempos. Es un dover sakro de kada Djudio de transmeter este rekuerdo de jenerasyon en jenerasyon, por nunka olvidarlo, syempre akodrarlo...

Oy, 23 Enero, en la pajina “Kavram” del prezente “Şalom”, ampesi a la primera partida de mi treslado del artikolo: “Sujeto Neglijado: los Sefaradim en la SHOA”. El teksto orijinal fue publikado en el No. 27 de “El Amaneser”, (Dosye del Mez) embiyado por Rachel Amado Bortnick de Dallas. Entri en kontakto kon eya, demandandole aprovasyon para tresladar (i al menester un poko adaptar) al Turko este teksto ke, en realidad es un presyozo dokumentaryo realizado kon los rezultados de diversos manaderos. Konsiderando la importansa del sujeto, muestra amiga Rachel eksprimio su kontentes de pueder publikar el artikolo tambyen en Turko, i ansi alkansar a un mas grande shifro de lektores.

Keridos amigos, en Mayo, kuando lo meldi, la verdad ke me influensi muy muncho. Al momento pensi komo topar un remedyo de azerlo konoser a los ke no meldan Judeo-Espanyol. A primera vista, la largor del teksto me izo un poko ezitar. Aun kon todo, ampesi a tresladarlo, pensando ke pudiya azer un rezume. El rezultado no me dyo satisfaksyon, porke kada paragrafo tyene su importansa. Por un syerto tyempo, i un poko deskorajada! de las kalores del enverano 2007, remeti el proyekto para agora, ke son diyas de komemorasyon...

Aktualmente ke entri al korason mizmo del sujeto, lo esto bivyendo komo en una sorte de “Empati”. Me esto sintyendo opremida, no keryendo kreer a los shifros ke estan bolando en mi komputadera... No keryendo kreer a tanta salvajeriya i krueldad... Todo el tyempo ke estuve eskrivyendo tuve unikamente un penseryo, dandome un mesaje de mi para mi: “Nunka pensaremos kon un sentimyento egoisto, bueno ke no bivimos mozotros este ginnam, estas atrosidas..” Nunka pensaremos ansi, keridos amigos, porke, komo esta dicho en este teksto ke tresladi: Kada uno de mozotros semos un “Sovrebiviente”...

Vo terminar del teksto orijinal, kon la konkluzyon de R.A Bortnick: “La Shoa es una katastrofa ke toka a las mas profundas emosyones de kada Djudio. Komemorar, akodrar i saver lo ke se paso es muestro dover, ansi ke rogar i lograr a ke nunka akonteska mas, ni a mozotros ni a dingunos. Es muestro dover tambien de mantener la Kultura Djudia, la kuala fue tambien kaji asasinada por los Nazis en la Shoa. Komo Sefaradis sovrebivientes, mos kaye a mozotros de salvar a la Kultura i Lengua ke era de muestros ermanos pedridos en la Shoa, i ke es la muestra tambien.”