La elevasyon del dolar en Turkiya i el problem de las mosas / ayudantes gurdjis o irmenis

Silvyo OVADYA Köşe Yazısı
15 Ağustos 2018 Çarşamba

Ay munchas personas ke biven en otros paizes i mizmo si son orijinarios de muestra sivdad o mizmo de muestro payis se selan de la komodita ke tenemos kon las mosas. I eyas trokan de nasyonalidad. Un syerto tyempo avia ayudantes de la Filipina i mizmo de la Bulgariya - de orijin turka i avlavan turko. Mizmo kuando nasyo mi ijo Eyal teniyamos una ayudante orijinaria de Bulgariya ke mos ayudo muncho. Un sierto tyempo despues, fue la moda de las ayudantes ke venian de Turkmenistan, de Armenia o de Georgia (Gürcistan). Mizmo oy en diya en muestro apartamento en la Ada (ande ay 17 moradas (hane)) tenemos kuatro o sinko ayudantes de la Georgia i avlan en sus linguas gritando lo mas.

Era diya de viernes despues ke el dolar tomo un buen yampish ke mi ija ke mora en Londra i ay dyes diyas ke esta en Estambol me esta kontando ke en el doredor de la pisina de muestra kaza en la Ada el sujeto ke fue tratado el mas era la mezada de las ayudantes despues de la augmentasyon del dolar. Syertos estavan dizyendo “yo konosko sus famiyas i no puedo amenguar sus mezadas. Otras estavan dizyendo si se va de Estanbol va topar en la Georgia un buen echo ande va pueder tomar entre 150 i 250 dolares si konose el inglez i si es diplomada de una buena universidad. Es por esto ke la ayudante ke lavora en muestra kaza ke es kimista alimpya, giza i lava... Malorozamente son las kondisyones de los payizes....

Tenemos de menester de estas ayudantes no solo en las kazas ande ay kriaturas ma en syertas kazas ande moran persona/personas aedadas. I si estas personas no son kapaches de kaminar o de pueder komer tenesh de menester de una persona si no keresh dar vuestra madre o vuestro padre a un azilo.

Ma oy en diya en muestro payis el problem va ser la mensualidad de estas personas.

Estavan ganando entre 500 i 800 dolares. Ma oy en diya dingunos van a kerer pagar esta moneda i dos mezes vamos a tener problemes muy seryozos. Eyas para achetar la mueva mensualidad i mozotros para pueder pagar lo mas para tener la mizma komodita.