El privilejyo de bivir en la Isla de Burgaz

Şeli GAON Judeo-Espanyol
8 Ağustos 2018 Çarşamba

La isla Burgaz, es la tresera komo grandor de las Islas de Prens de Estambol, ande ay sharas (orman) de pinos (çam), i munchas kazas elegantes de tavla antiguas.

Bivir en esta isla es un privilejyo (ayrıcalık) para las personas. Aki no ay la nosyon del tiempo. El tiempo pasa aki sin depender de unas kozas.

Demanyana dar un torniko en el bodre de la mar entre los arvoles de pino, djugar en el kafe unas dos manos de kartas, i la noche bever un poko es un divertimyento (eğlence). Dar un torno kon la barka, ir a peshkar, asender el ogar (mangal) para asar las karnes, djugar kon top, entrar a la mar, kaminar kon bisiklet, azer el torno fina Kalpazankaya kon faytones (arabas kon kavayos), son las aktivitades de la isla.

Burgaz es la isla la mas asolada (tenha) i la mas natural (doğal) entre las otras. Burgaz es un sentimyento delisyozo, un amor, una pasyon (tutku) espesyal para los ke se auzaron a bivir aya durante largos anyos.

El Dyo ke mos ayege de ir kada anyo a esta estimada isla, djusto komo un kazal chiko, ande se konosen todos i se saludan, avlan i burlan kon una kerensya ke no se topa en el dia de oy.

Kada anyo a la fin del mes de Mayo, los aedados empesan a vinir, para pueder pasar un enverano alegre despues de un invyerno largo i yeno de problemas.

A poko a poko todos se arekojen i se entyende ke ya empesaron los tyempos kayentes, i la sezon de entrar a la mar. Las islas son el lugar el mas serka para pueder fuyir del bruido de Estambol.

En el Imperyo Bizantino, estas islas eran utilizadas komo el lugar de egzilyo (sürgün) de los prenses i de los emperadores. Esto es la kavza ke los etranjeros konosen estas islas komo, “Las Islas de los Prenses”.

Los primeros ke empesaron a bivir en las islas eran los eskrivanos i los artistos (sanatçı). Las minoridades komo los gregos, djudyos i ermenis empesaron a azer kazas de enverano. En este periodo, se planto munchos arvoles, rozas i flores en el entorno de las kazas istorikas entre las kayes dekoradas de estas kazas.

“Bayrak Tepe” es una kolina (tepe) de ande se puede kontemplar “Halki” (Heybeli ada) i las otras islas kon un panorama maraviyozo.

En “Kalpazankaya” puedemos ver una vista de la echada del sol (güneşin batışı) multikolor. Aki el nombre es Kalpazankaya; porke aki se emprimiya la moneda falsa.

En invyerno biven aki kaji 1.500 personas, i en enverano 15.000 personas. El nombre istoriko de Burgaz es “Antigoni”, komo Heybeli ke se yama “Halki”, Kınalı ke se yama “Proti”, i Büyükada ke se yama “Prinkipo”.

Burgaz es una isla kozmopolita onde biven munchas minoridades kon grande kerensya i armoniya. Todos se frekuentan djusto komo una famiya. Es la isla la mas trankila entre las otras. La kerensya i la unyon al den frente egziste en todos. En todo modo de evenemento, negro u bueno, a parte de la famiya, los vizinos, amigos i aliados (dost) todos koryen para ayudar i ser util para kualker koza ke seyga. Esto es una fuersa para la persona i no se syente sola.

 Es un privilejyo de bivir en Burgaz los enveranos. El Dy o ke no mos kite el repozo i ke mos ayege a vinir kada anyo kon sanedad i felisidad, i ke seygamos todos los djudyos aunados kon tolerensya unos kon los otros…