Ekev

La persona no bive solamente kon el pan ke kome, sino ke kon la dicha i el orden del Kriyador. Ansi meldamos en uno de los versetos de la perasha, “Ki lo al alehem leavado yihye aadam ki al kol motsa pi ashem yihye aadam.”

Devemos de aplikar todas las enkomendansas ke nos enkomendo el Todo Poderozo. Moshe Rabenu nos kijo dizir, el ombre es valorozo en el mundo. El Kriyador kriyo este mundo i no lo entrego a nozotros. Ijos de ombre, devemos de sirvir a El. El ombre no asemeja a otras kriyansas. La kuatropea i las aves ya vyenen a el mundo prontos kon sus vistimyentas i los atkuendos de defendersen, tambien mismo sus mantenimyentos.

Vinyendo a el ombre, para komer un pedaso de pan, deve de arar i sembrar, de arekojer sus produktos, azer la arina i komer su pan. Ansi mismo todo su mantenimyento por defenderse de los enimigos, deve aprontar armas. Se entyende ke el ombre todo lo ke tyene menester deve de aprontarlo el mismo. Komo meldamos en la Tora, kuarenta anyos en el dizyerto no tuvyeron de menester de ningun aparejo ni de vistir ni de komer. Si no ke el Kriyador kon sus milagros grandes los giyo a el puevlo judyo.

Dunke, agora ke ya estavan serka de entrar a la tyerra prometida, ayi ivan a ser patrones de vinyas i kampos. Patrones de kazas, por esta kavza estamos enkomendados de parte del grande profeta Moshe Rabenu. Kuando vas a fraguar kozas, vas a plantar kampos i vinyas. No diras: kon mi fuersa, mi sensya i mi entelijensa parvine a tener esta grande fortuna. No deves de olvidarte ke el Kriyador es ke nos da la fuersa i la entelijensia de reushir i parvinir. Por esta razon les disho: Ke la persona no bive solo kon el pan ke kome, sino ke solamente kon la dicha i el orden del Dyo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın