Ansi enpesa le Perasha “Devarim” ke es el enpesijo de el sinken livro de la Tora. Estas son las palavras ke avlo Moshe a el puevlo de Israel. Son palavras de kastigeryo. Moshe Rabenu en sus diyas de alkavo, kastigo a el puevlo djudyo, en la yanura de el Yarden.
El les izo akodrar lo yerros ke izyeron entervalo de kuarenta anyos en el dizyerto,
los diyas ke vinyeron kontra el Kriyador; ke disheron, mijor era de murir en Mistrayim, ke de vinir a este dizyerto; ke sirvyeron el idolo de Peor; ke disheron a Moshe Rabenu no ay simiteryos en Misrayim ke nos trushites por murir en el dizyerto. Vos keshates por la magna ke vos dyo el Kriyador por mantenervos. Izitesh el bezer de oro. Les aze akodrar Moshe Rabenu el yerro ke izyeron los eskulkadores de avlar mal por la tyerra prometida. Moshe Rabenu todos estos kastigeryos los izo a el puevlo djudyo sekretamente. No los kijo azer averguansarlos, de la estima ke teniya verso el puevlo djudyo. Ma despues vemos ke Moshe Rabenu kuaremente les aze akodrar los yerros ke izyeron el puevlo, entervalo de los kuarente anyos ke estuvyeron en el dizyerto. Dizen muestros savyos la persona ke aksepta i desha a su pekado, este pekado se le aze merito. Moshe Rabenu ke konosiya muy bien a su puevlo, ya entendyo, ke el puevlo akseptaron sus yerros dunke no aviya ningun danyo de akodrarselos klaramente ke todos los yerros se izyeron meritos. Moshe Rabenu ekspliko la Tora entera a el puevlo djudyo malgrado ke ya avian sintido en el Monte Sinay. Moshe Rabenu tuvo de menester de repetirla, a los ke nasyeron en el dizyerto, a la jenerasyon nueva. La jenerasyon nueva no aviyan sintido en el monte de Sinay de boka de el Kriyador, sino ke eyos sintyeron todos estos evenementos de boka de sus jenitores. Malgrado ke la jenerasyon nueva teniya una grande fey i kreyensa, Moshe Rabenu tuvo el menester de eksplikarles el mizmo.
Moshe Rabenu disho a el puevlo djudyo: El Kriyador enkomendo i disho, basta agora ke estuvitesh lado el monte de Sinay. Ya afirmatesh munchas enkomendansas, ya resivitesh la Tora, ya fraguatesh el tabernaklo, ya formatesh el Sanhedrin, el Tribinal, agora kamina adelantre. Agora vos se esta avriyendo el kamino de la tyerra prometida.
Moshe Rabenu eskojo i tomo el biervo Devarim por el empesijo de la perasha, mismo biervo Devarim la sinyifikasyon es bizbas, komo las bizbas nos dan miel ke es dulse. I la Tora nos adulsa a nozotros, i es vidas para nozotros, komo es dicho arvol de vida es a la ke la sostyenen, i todos ke sostyenen a la ley son orozos.
