Balak

Los ijos de Israel vinyeron a el lugar nombrado Arvot Moav, enfrente de la sivdad Yereho. Este paso ke dyeron los ijos de Israel i las viktoryas ke estavan ganando kon la ayuda del Kriyador, izo retemblar muy muncho a el puevlo de Moav. Los moradores de Moav, kijeron venserlos a los djudyos, kon unos remedyos afuera de la natura.

Sovre esto, el rey de Moav Balak, se akonsejo kon el puevlo de Midyan, ke manera azer por kitar de el mundo a el puevlo djudyo. Desidaron entre eyos de mandar a yamar a Bilam el echizero ke morava en Peor por ke maldiga a los ijos de Israel. Mandaron unos grandes personajes de la sivdad de Moav i de la sivdad de Midyan i vienen onde Bilam, i le rogan al nombre del rey de Moav Balak, de vinir kon eyos a la tyera de Moav i maldizir a los djudyos. Las personas ke mando Balak le dizen a Bilam, nuestro rey Balak esta muy siguro ke a ken maldizes es maldicho i a ken bendizes es bendicho.

Bilam les dize ke el no es un echizero sino ke es un profeta ke esta debasho de el orden del Dyo Santo, ke esperen una noche i el les respondera.

El Dyo aparese su vizyon a Bilam i le damanda: ke son estas personas ke vinyeron ande ti? Bilam le responde ke son mandados del rey de Moav por ke vaya i maldiga a Yisrael. El Dyo lo defende de ir a maldizir a los djudyos syendo el puevlo djudyo ya es un puevlo bendicho.

A la manyana les dize Bilam a los mesajeros ke se tornen a sus lugar, ke el Kriyador no lo desho ir kon eyos. Balak le manda otras personas i mas onorados, i le promete muncha plata i oro de azerlo todo lo ke demanda. Bilam ke sintyo estas prometas de el rey Balak, los detyene a los mesajeros una noche i va se enforma, lo ke va kerer el Dyo de avlar.

El Kriyador se aparese otra vez a Bilam i le permete de irse kon eyos onde Balak, ma a kondisyon ke no puede avlar mas ke lo ke le va ordenar el, el Kriyador. Bilam, a un ke ya entendyo byen ke la veluntad del Dyo es bendizir a el puevlo djudyo i no maldizirlo, kon toda la esparansa de la buena paga i de la muncha onra ke tyene ke resivir de Balak lo izo yorar i se levanta kon muncha kovdisya i se va kon las personas de Balak.

Bilam no reusho a maldizir a el puevlo djudyo, syendo ke no lo desho el Kriyador ke maldiga a el puevlo djudyo sino ke los bendicho a el puevlo kon estos biervos:

“O puevlo Santo de Yaakov kuantas ermozas i buenas i onestas son tus tyendas, i tus moradas.”

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın