Aktualidades

Silvyo OVADYA Köşe Yazısı
30 Mayıs 2018 Çarşamba

Kero empesar mi artikolo en felisitando muestro redaktor principal İvo Molinas i su mujer Miriam porke tuvieron el plazer de kazar sus ijas Serra en la Sinagoga de Neve Şalom diya de alhad. La sinagoga reelmente estava yena i todos estavan kontentes de ver una seremonia yena de emosyon. El Gran Rabino Haleva estava entre los envitados. Avia syertos djornalistos de la prensa nasyonal.  En siertas seremonias si keresh la sinagoga vos da un kantador: ke es Cenk Rofe i ke kanta antes de la seremonia kuando la djente esta asperando. I reelmente es muy enteresante de ver un kantador en la seremoniya. La seremoniya fue dirijada por los hazanes Rav Sevi i Menahem Eskenazi. El Rav Adoni avlo sovre las famiyas i yamo el novyo para ke afirme la ketuba. Reelmente es una seremoniya muy emosyonante. Kero felisitar las gramamas Lina Kaneti i la Sinyora Molinas. Esto ogurando felisidades a la novya i al novyo.

  Es muy enteresante si meldash la istorya de los djudios turkanos puedesh ver mizmo syen anyos antes ke organizan iftares (kortadura de ayuno muzulmano) en el mez de Ramazan. Esto es una manera de respekto enverso los muzulmanos ke son la mayoriya del payiz. Los vente anyos dalkavo los dirijentes estavan organizando iftares en el Sentro Kultural de la Sinagoga de Neve Şalom. Despues se izo una komida muy “a la hauteur” i la mueva idea fue de organizarlo en la kaza de los menesterozos, “Darülaceze”, ande biven syenes de personas menesterozas. Para los ke no saven, en esta asosyasyon se topa una iglesia i una sinagoga tambien.

  Tres anyos antes despues ke la Grande Sinagoga de Edirne fue restorada i la Komunidad Djudia de Estanbol empeso a vijitar esta sivdad i su sinagoga, los diridjentes en primero organizaron en un lugar istoriko, el segundo anyo en la kaye de la sinagoga i a la fin dyeron karar de azer la kortadura de ayuno en la guerta de la meshkita de Selimiye ke es la ovra maestra del Arkitekto Sinan. I los diridjentes de la Komunitad Djudia kon sus prostelas, estan sirvyendo a miles de personas la komida. Reelmente el efekto de este movimyento esta muy efikache (etkin).

  La semana pasada vos avli de la pedrita del Sinyor Jak Strugo. I el diya de los funerales ke se realizaron en la Sinagoga de Ortaköy fuimos a Haydarpaşa ande se esta fraguando la eskola de la Aliansa ke sirvio un tyempo largo a la Komunidad de Haydarpaşa. I kon el apoyo materyel de una persona ke lo konosemos por su djenerozita, estamos restorando estos dos edifisyos istorikos. No se si van alkansar para esste anyo ke empesa en el mez de septembre. No savemos dainda kualo va ser la kapachidad del edifisyo. Ma kreo ke va ser una ganansya emportante para la komunidad de Caddebostan/Haydarpaşa. Kreo ke estos dos edifisyos van a karshiladear el menester de la komunidad. Para kualo?

  Reelmente es un plazer para mi de ver los edifisyos antiguos ke se estan empleando oy en diya mizmo si no estan en buenas kondisyones. El 10 del mez de julyo, la Sinagoga de Abudara va ser el lugar para la prezentasyon de una seria de livros a una asosyasyon ke lavora para la erensia kultural de muestro payis. Este modo esta sinagoga va ser konosida por munchas personas ke son enteresadas en las ovras i los edifisios istorikos.